Qaraǵandy oblysy TJD bastyǵy Murat Qatpanov kanal sýyna batyp ketken 9 jastaǵy balanyń ólimine qatysty pikir bildirdi, - dep habarlaidy Tengrinews.kz tilshisi.
Qatpanovtyń aitýynsha, balanyń ólimi jazataiym oqiǵa nátijesinde bolǵan. Bala dostarymen birge sýǵa qaiyq jiberip, ashyq kanal mańynda oinaǵan.
"Bir kezde qaiyq turyp qalǵan. Marqum ony iterip jibergisi kelip, sýǵa qulaǵan. Qatty aǵys ony aǵyzyp áketken. Mamandar dabyl túskennen keiin birden oqiǵa ornyna shyqty. Balanyń denesi bir saǵat ishinde ózi qulaǵan jerden bes júz metr qashyqtan tabyldy", - dedi Murat Qatpanov.
Sondai-aq, ol bul kanalda eshqandai qorshaý joq ekenin atap ótti.
"Qazir Qaraǵandy oblysynda qar erip jatyr. Aryqtar men kanaldarda sý kólemi artty. Sondyqtan ata-analardy baqylaýdy kúsheitýge shaqyramyz. Balalarǵa qaýipti jerlerdiń mańynda oinaýǵa ruqsat bermeńizder. Ókinishke qarai, árbir kanalda kezekshi bola almaimyz. Bul kanaldar tehnologiialyq jaǵynan ashyq, qorshaýsyz bolýy kerek", - dep atap ótti Murat Qatpanov.
Qaraǵandy oblysynyń PD ókili bala qaitys bolǵany týraly derek tirkelgenin, oqiǵanyń mán-jaiy anyqtalyp jatqanyn aitty.
Aimaq basshysy Jeńis Qasymbek qaza tapqan balanyń ata-anasyna kóńil aitty. Ol ákimdikke balalar jaraqatynyń aldyn alý boiynsha jumysty kúsheitýdi tapsyrdy. Sonymen qatar, ákim qaýipti kanaldardyń mańyna eskertý belgilerin qoiýdy tapsyrdy.
"Mundai qaiǵyly oqiǵa qaitalanbaýy kerek. Oblys boiynsha sý tasqynyna qarsy is-sharalar júrgizilip jatyr. Kóp qar eridi. Jaýapty qyzmetter kez kelgen shtattan tys jaǵdaiǵa daiyn bolýy kerek", - dedi Jeńis Qasymbek.
