Qaraǵandy orta mektepteriniń birinen janjal shyqty. Dene shynyqtyrý sabaǵy kezinde muǵalim jasóspirimge qol kóterip, ony edende súiregen, dep habarlaidy QazAqparat.
Qaraǵandynyń tanymal blogerleriniń biri óziniń Instagram paraqshasynda shaǵymdanyp kelgen áiel týraly post jariialady.
Áiel on úsh jasar ulyna dene shynyqtyrý pániniń muǵalimi qol kótergenin habarlaǵan.
Oqytýshy balanyń basynan bir-eki ret soǵyp jiberip, búkil synyptastarynyń kózinshe keýdeshesiniń kapiýshonynan tartyp súirep ótken.
«Kimniń kináli ekenin bilmeimin, múmkin meniń ulym bul oqiǵa kezinde jaǵdaidy ózi ýshyqtyrǵan shyǵar, biraq muǵalim balalardy urmaýy kerek, balanyń babyn taba bilýi kerek», - dep jazady oqýshynyń anasy.
Qaraǵandynyń bilim bólimi bolǵan oqiǵa týraly mynadai túsinik berdi:
«Direktor atalǵan fakti boiynsha qyzmettik tergeý bastalǵanyn jáne bolǵan jaǵdai týraly dene shynyqtyrý pániniń muǵalimi baiandaǵanyn túsindirdi. Mekteptiń sport zalynda beinebaqylaý kamerasy bar, beinejazba bul jaǵdaidy obektivti túsinýge kómektesedi. Qyzmettik tergeý qorytyndysy týraly qosymsha habarlaimyz».
