Foto: Polisia.kz
Qaraǵandyda “Arlan” arnaiy maqsat qyzmetkerleri óz áieli men 2 jasar qyzyn kepilde ustaǵan kúdiktini quryqtady, – dep habarlaidy "Ult aqparat" Polisia.kz portalyna silteme jasap.
26 sáýir saǵat 12.00 shamasynda Qaraǵandy qalalyq politsiia basqarmasyna qarasty Temirjol politsiia bólimine qaladaǵy kópqabatty úilerdiń birinde janjal bolyp jatqany týraly habarlama túsken. Oqiǵa ornyna jedel tergeý toby jiberilip, habarlama rastalǵan.
"Belgili bolǵandai, 24 jastaǵy azamat birge turatyn 21 jastaǵy jary men 2 jastaǵy qyzyn pyshaqpen qorqytyp, kúshtep ustaǵan. Alaida ol eshqandai shart qoimaǵan. Qaskóimen aradaǵy kelissóz úsh saǵattan astam ýaqyt júrgizildi. Azamat eshqandai kelissózge kónbedi. Kepildiktegi adamdardyń ómirine qaýip tóngendikten, politsiia qyzmetkerlerine shuǵyl sheshim qabyldaýǵa týra keldi", – deidi Qaraǵandy oblystyq politsiia departamenti bastyǵynyń orynbasary Ábil Ábildin.
Tótenshe jaǵdailar departamentiniń qyzmetkerleri páterdiń esigin buzǵan bette, “Arlan” arnaiy maqsat qyzmetkerleri birden ishke kirip, kúdiktini qolǵa túsirgen.
Aldyn ala boljam boiynsha azamat esirtkige eltigen kúide bolǵan. Al anasy men qyzy eshqandai jábir kórmegen. Olar daǵdarys ortalyǵyna ornalastyrylyp, psihologiialyq kómek kórsetilip jatyr.
Atalǵan derek boiynsha Qazaqstan Respýblikasy QK-niń 126-baby 2-bóligi 3-pýnktine sáikes qylmystyq is tirkeldi. Qazir tergeý áreketteri júrgizilip jatyr.
