Qaraǵandy oblysy Shet aýdanynyń eki turǵyny 174 million teńgege alaiaqtyq jasady degen kúdikpen ustaldy. Olar ózderine senip tapsyrylǵan jylqylardy satyp jibergen. Atalmysh is boiynsha barlyǵy 50-den astam jábirlenýshi tyńdalyp jatyr, dep habarlaidy "Ult aqparat".
Baqtashylar 2007 jyldan 2020 jylǵa deiin jylqylardy baǵýmen ainalysqan. Osy ýaqyt ishinde olar 507 bas maldy satyp, aiyrbastap, «joǵaltyp» jibergen. Jylqy ieleri mal sanynyń jetispeitinin tek 2020 jyldyń qarasha aiynda bilgen.
«Kúdiktilerdiń ekeýi de Shet aýdanynyń týmalary. Olar jylqylardy baǵýmen ainalysqan. Jylqy ielerimen jazbasha kelisim bolmaǵan. Aýyzsha kelisim boiynsha baǵýmen ainalysqan. Adamdar olarǵa jerles bolǵandyqtan sengen. Mal jaiý kezinde álgiler 507 jylqyny satyp jáne aiyrbastap úlgergen. Sonymen qatar, keibir jylqylardy tiridei, al keibirin soiyp satqan. Ol jaily mal ieleri bilmegen. Birneshe adam bir jylqyǵa ie bolǵan jaǵdailar da boldy, sebebi ony baqtashylar birneshe ret almastyryp otyrǵan. Sondai-aq naqty qansha ret tóldep, qansha qulyn baryn jasyryp kelgen. Mysaly, bie osy jyldar ishinde 13 ret qulyndasa, baqtashylar bar bolǵany 5 qulyn jaily ǵana aitqan», - deidi Qaraǵandy oblysy PD tergeý basqarmasynyń asa mańyzdy ister jónindegi aǵa tergeýshisi Qanat Sailaýuly.
Shopandardyń alaiaqtyq áreketteri tek 2020 jyldyń qarasha aiynda ashyldy. Soǵym soiý maýsymy aldynda birneshe jábirlenýshi maldaryn ákelýdi suraǵan. Al maldy aidap alyp kele almaǵan kezde, jylqy ieleri bul jerde shikilik baryna kúdiktenip, máseleni anyqtai bastaǵan. Shyndyqty bilgen bette jábirlenýshiler birinen soń biri jergilikti politsiia bólimine ótinish jaza bastaǵan.
«Eger jylqy ieleri ai saiyn janýarlardyń bar-joǵyn tekserip, olarǵa tańba salyp otyrsa, alaiaqtyqty erterek anyqtaýǵa bolar edi. Adamdar belgili bir jylqysyn alyp kelýdi suraǵanda, olar úiir alysta jaiylyp júrgenin aityp syltaýratqan. Keibireýler tipti jylqylaryn tanymaǵan. Olarǵa baqtashylar basqa jylqyny kórsete salǵan», - deidi Qanat Sailaýuly.
Qazirgi ýaqytta QR QK 190-babynyń 3-bóligi «Iri kólemdegi alaiaqtyq» boiynsha qylmystyq is qozǵaldy. Eger olardyń kinási tolyǵymen dáleldense, 3 jyldan 7 jylǵa deiin bas bostandyǵynan aiyrylýy múmkin.
«Kúdiktiler kináni ishinara moiyndady. Osy aidyń sońyna deiin is boiynsha tergeý júrgizý aiaqtalady jáne ol sotqa beriledi», - dep qosty aǵa tergeýshi.
