Qaraǵandy oblysynda karantin rejimi qalai jáne qai jerde buzylǵanyn óńirdiń jedel áreket etý ortalyǵynyń basshysy Qairat Shormanbaev tikelei efirde ótken brifing barysynda aityp berdi, dep habarlaidy "Ult aqparat".
Tikelei efirde ótken brifingte Qaraǵandy oblysynyń jedel áreket etý ortalyǵynyń basshysy Qairat Shormanbaev qai mekemelerde karantin talaby buzylǵany týraly aityp berdi. Sondai-aq, spiker qashyqtyqty saqtamaý, maska kimeý jáne mekemelerdiń ruqsat etilgen ýaqyttan tys jumys isteýi siiaqty jii kezdesetin zańbuzýshylyqtardy atady.
Onyń aitýynsha, oblysta 214 monitoringtik top jumys isteidi, olar nysandardaǵy karantin talaptarynyń tek bes túriniń saqtalýyn tekseredi. Bul qyzmet kórsetý nysandarynyń ruqsat etilgen ýaqyttan tys jumys isteýi, otbasylyq merekeler – banketter, úilený toilary, mereitoilar, eske alý jáne adamdar kóp jinalatyn basqa da sharalardy uiymdastyrý, ara qashyqtyqty saqtamaý, betperde taqpaý, qyzmet kórsetý nysandaryna kelýshiler sanynyń shekten tys kóp bolýy.
«Jyl basynan beri 10 978 nysan tekserilip, 429 zańbuzýshylyq anyqtaldy, al aiyppul somasy 4 million teńgeden asty. Ótken aptada Qaraǵandy oblysynda karantin rejimin buzǵan 6 nysan anyqtaldy: tekserý kezinde olarda 247 adam boldy jáne olardyń barlyǵy ákimshilik jaýapqa tartylady», - dedi Qairat Shormanbaev.
Karantinde tyiym salynǵan qyzmet túrleri bar nysandarda, sondai-aq 22.00-den keiin qoǵamdyq tamaqtaný oryndaryna baratyn óńir turǵyndaryna 30 AEK kóleminde aiyppul salynady. Mundai oryndardyń tizimine banket zaldary, biliard, karaoke, boýling ortalyqtary, batýttar, kompiýter, oiyn jáne túngi klýbtar, býkmekerlik keńseler kiredi.
«Mundai nysandarǵa barý – infektsiianyń taralýy qaýpin artyrady. Eger kámeletke tolmaǵandar osyndai oryndarda júrse, aiyppul ata-analaryna salynady», - dep eske saldy spiker.
Ol karantin talaptarynyń buzylýy týraly «Senim 109» biryńǵai úilestirý ortalyǵyna habarlaýǵa bolatynyn, onda kelip túsken aqparattardyń tekserilip, ol rastalǵan kezde tiisti sharalar qabyldanatynyn aitty.
