26 qyrkúiek kúni saǵat 18.00-de Qazaqstannyń halyq artisi, ónertaný professory Meiramov Tilektes Ýahitulynyń 70-jasqa tolǵan mereitoiyna orai «Qar ústindegi kógershinniń izi» atty shyǵarmashylyq keshi ótedi.
Atalǵan is-shara Mádeniet jáne sport ministrliginiń qoldaýymen, M.Áýezov atyndaǵy qazaq memlekettik akademiialyq drama teatry men Qazaqstan teatrlary assotsiatsiiasynyń uiymdastyrýymen qolǵa alynyp otyr.
Qazaqstannyń halyq artisi, ónertaný professory Meiramov Tilektes Ýahituly 1948 jyly 20 mamyrda Qaraǵandy oblysy Ýlianov aýdany Sverdlov atyndaǵy sovhozda (qazirgi Buqar jyraý aýdany Kókpekti aýylynda) dúniege keldi.
1971 jyly Almatydaǵy Qurmanǵazy atyndaǵy Óner Institýtyn «teatr jáne kino akteri» mamandyǵy boiynsha professor A.Toqpanov pen Sh.Jandarbekovanyń jetekshiligimen bitirip, Qazaqtyń memlekettik akademiialyq M.Áýezov atyndaǵy drama teatryna qabyldandy. Sahnadaǵy alǵashqy qadamynan-aq, Qozy Kórpesh rólimen jarq etken Tilektes Meiramov teatr mamandary, synshylar men kórermender nazaryna birden ilikti.
Akterlik aýqymy keń, tabiǵi daryn iesi Tilektes Meiramov oryndaǵan rólderiniń ishki jan dúnieleriniń qatparlaryn, kúrdeli bolmystaryn ashý jolynda óte tereń izdenisterge barady. Shyǵarmashylyq jolynyń bastaýynda-aq Qozy Kórpesh, Aqan Seri, Birsimbai, Jaras, Erkin, Toqpaev, Valter, Jantai siiaqty ár janrdaǵy kúrdeli beinelerdi sheber oryndaǵan akter sahnaǵa oily, sezimdi, armany men qaiǵysy, muraty men qasireti qabat qyzýqandy keiipkerlerdi molynan shyǵaryp, teatr repertýarynan tek ózine tieseli, Tilektes Meiramovqa ǵana tán ózindik ornyn ala bildi.
Teńdessiz akter, Ánýar Moldabekov oinaǵan Voinitskii, Jantyq, Kerim siiaqty rolderdiń basqaǵa emes, T.Meiramovqa júktelýiniń ózi kóp jailardy ańǵartsa kerek. Aitar oiǵa myǵym, eshbir amplýa, tip, harakter dep bólip-jarmai, barynsha shynshyl, shynaiy, qiialyna qondyrǵandaryn, kókeiine kóndikkenderin naǵyz kórkem beineler deńgeiine kóterip, som da soqtaly, kesek te kelisti etip nusqalaý-akterlik oi erkindiginiń bultartpas kórinisi. Bul rette Shyńǵys han, Jáńgir han, Edil patsha, Bedel, Sorin, Bekter, Antonii t.b. rólderdi erekshe ataý kerek.
T.Meiramovtyń somdaǵan rolderiniń ishinde A.Súleimenovtiń «Sitýatsiialar» triptihindegi bas keiipkerler búgingi zaman, áleýmetimizdiń, rýhani oi-biigimiz ben júdeýligimizdiń simvolyndai kelisti kórkemdik qalybyn tapqan Jumat, Málik, Prokýror ómirimizdegi indetterdiń túp- tamyryna úńiltedi, akterdiń qarymdy sheberligi, kóp qatparly ideialary, sózsaptaý ustanymdary óz kórermenderin ashy saýaldarǵa ortaqtas, pikirles, jaqtas etedi.
T. Meiramov monospektakl janryna qadam jasaǵan tuńǵysh qazaq akteri. Ár jyldary Ǵ.Músirepovtiń «Aqan seri-Aqtoqty» tragediiasyn, R.Seisenbaevtyń «Maidan ánderi», N.V. Gogoldiń «Jyndynyń jazbalary» áńgimelerin, Ý.Shekspir, A.Griboedov, Ǵ. Músirepov shyǵarmalary boiynsha daiyndalǵan «Aqyldan azap» spektaklderin jalǵyz oryndap shyqty.
Áigili teatr qairatkerleri A.Toqpanov, Sh.Jandarbekova, Á.Mámbetov, E.Obaev syndy sheberlerdiń mektebinen ótken, qyzmet etken teatrlaryna, dos-jarandaryna, kórermenderine, eń bastysy-ózi súigen Tól Ónerine degen adaldyǵymen, qýatty talantymen, biik oryndaýshylyq sheberligimen syily Tilektes Meiramovtyń shyǵarmashylyǵy «ulttyq sahnamyzdyń búgingi biigi osyndai» dep aitýǵa ábden turarlyq shyn sheberlik ekenin qadap aitý artyq emes.
Ol 2001 jyldan beri Qazaqtyń Ǵ.Músirepov atyndaǵy akademiialyq jastar men jasóspirimder teatrynda direktor, Astanadaǵy jastar teatrynda bertinirekte kórkemdik jetekshi qyzmetterin de atqardy. 2011 jyly Qyrǵyz Memlekettik B.Beishenalieva atyndaǵy Óner Institýtyn «Rejissýra» mamandyǵy boiynsha syrttai oqyp bitirdi.
Teatr jáne kino salasyndaǵy eńbegimen birge ádebi-shyǵarmashylyq jumystarmen de ainalysady. A.Gelmannyń «Naedine so vsemi», N.Abdýlloevtyń «Dvoe», I.Vovniankonyń «Smert striptizera» pesalaryn qazaqshaǵa aýdarsa, I.Esenberlinniń «Ǵashyqtar», Sh.Aitmatovtyń «Ǵasyrdan da uzaq tún» romandaryn, R. Otarbaevtyń «Dúnieǵaiyp» povesin, O’ Genridiń «Úndisterdiń kósemi» áńgimesin sahnaǵa, al M.Áýezovtyń «Abai joly» romanyn telearnaǵa laiyqtap instsenirovkalar jasady.
1993 jyly «Shyńǵyshan» spektaklindegi Shyńǵys han beinesi úshin «Úzdik er adam roli» (avtory I. Orazbaev ); 2004 jyly «Qozy Kórpesh – Baian Sulý» spektaklindegi Qarabai beinesi úshin «Úzdik er adam beinesi» avtory (Ǵ. Músirepov); 2012 jyly KSRO halyq artisi Á.Mámbetovtiń 80-jyldyǵyna arnalǵan Qazaqstan drama teatrlarynyń XX-Respýblikalyq festivalinde Ǵ.Músirepovtiń «Aqan seri – Aqtoqty» tragediiasyndaǵy Naýan roli úshin «Eń úzdik er adam beinesi» júldelerin ielendi.
2006 jyldan Q.Qýanyshbaev atyndaǵy Memlekettik akademiialyq qazaq mýzykalyq drama teatrynda qyzmet atqaryp keledi.
V. Pusyrmanovtyń «Serebrianyi rog Alataý», «Proshai, krasavitsa», Mońǵol kinostýdiiasymen birlesip túsirgen «Strelok Hýmýchi», S. Táýekeldiń «Jeruiyq», A.Sataevtyń «Jaý júrek myń bala», r. Ábdirashevtyń «Qazaq handyǵy» R. Súleimenovtyń «Kogda angely spiat» t.b. filmderine tústi .
Halyq artisi T.Meiramovtyń shyǵarmashylyǵy sahnalyq joǵary mádenietimen, estetikalyqtalǵampazdyǵymen, akterlik izdenimpazdyǵymen erekshelenedi. Birneshe Halyqaralyq jáne Respýblikalyq teatrlar festivalderinde, O.Bókei atyndaǵy kórkemsóz oqýshylar baiqaýlarynda qazylyq etip búginde ustazdyq jolyn jalǵastyryp keledi.
