Qyzylorda oblysynyń Qazaly aýdanynda 19-ǵasyrda turǵyzylǵan Kelimbet baba kesenesi jylqynyń qanymen salynǵan, dep habarlaidy QazAqparat tilshisi.
Syr óńirinde qoinyna nebir qupiia-syrdy búgip jatqan kieli oryndar kóp. Solardyń biri - Kelimbet baba kesenesi.
Qojabaqy aýylynyń turǵyny, aqyn Ámirhan Qanaiulynyń aitýynsha, Kelimbet kesenesi shamamen 1898 jyly turǵyzylǵan. Arandy aýylynan ońtústik-shyǵysqa qarai 5 shaqyrym, Qojabaqydan batysqa 8 shaqyrym qashyqtyqta ornalasqan. Eskertkish - memleket qorǵaýynda.
«Kelimbet baba Asan rýynyń Mámeteginen taraǵan. Onyń kesenesin qojabaqylyqtar «Kelimbet tamy» dep atap ketken. Jalpy derek kózderine súiensek, Kelimbet XIX ǵasyrda ómir súrgen kisi eken. Zamanynda ózi «Bai bolsań, halqyńa paidań tisin» degen ataly sózdi ustanyp, halyqqa qaiyrymy mol jan bolypty desedi. El aýzyndaǵy áńgimeler boiynsha ol kisiniń áýlielik qasietteri de bolypty. Bir kúni Kelimbet dáret alatyn sháinegine sý quiyp, otqa qoisa, jazdyń ózinde sháinektegi sý erteńine qatyq bolyp uiyp turypty. Osyny kórgen ol elin jinap, uiyǵan qatyq sýdy birge bólip iship, jurtty uiyǵan airandai bolýǵa, aýyzbirshilikke, yntymaqqa shaqyrǵan», - deidi Ámirhan Qanaiuly.
Áýlie Qudaidyń rizalyǵyna bólený úshin qolǵa alǵan istiń árbirin igi nietpen bastaityn bolǵan. Kóziniń tirisinde Kelimbet halqyn jinap, elimiz tatý bolsyn, emen butaǵyndai qaýlasyn degen peiilmen úlken úi tam turǵyzǵan eken.
«Kúnine onshaqty jylqy soiǵan, onyń qanyn, jal-quiryǵyn balshyqqa qosqan. Sóitip, balshyqty qanǵa ábden ilep, úi tamnyń boiyn túzegen. Ári úidi salǵan adamdar dáretsiz júrmegen. Sondyqtan, úi tamnyń kirpishi sýǵa erimeidi, otqa órtenbeidi. Kelimbettiń kózi tirisinde salynǵan tamǵa ózi, Aijigit, Dáýit atty uldary men anasy, jubaiy jerlengen», - deidi Qojabaqy eldi mekeniniń taǵy bir turǵyny Darhan Bekjanov.
Kelimbettiń uly Aijigit 18 jyl bolys bolyp, eline syily azamat atanǵan. Qazirgi tańda Kelimbet babanyń urpaqtary dariia boiyndaǵy qonys tepken aýyldarda turyp keledi.
