Sheteldik qazaqtardyń Qazaqstan aýmaǵynda el azamattarymen birdei quqyqqa ie bolýyna múmkindik beretin «Qazaq kartasy» atty qujattyń jobasy daiyndalyp jatyr, dep habarlaidy QazAqparat tilshisi.
Bul týraly QR Eńbek jáne halyqty áleýmettik qorǵaý ministrligi, «Otandastar» qory jáne Dúniejúzi qazaqtary qaýymdastyǵy basshylarynyń birlesken otyrysynda aityldy.
«Otandastar» qorynyń prezidenti Nurtai Ábiqaevtyń aitýynsha, «Qazaq kartasy» dep atalatyn qujat sheteldik qazaqtardyń tarihi otanynda ýaqytsha ómir súrip, beiimdelýi úshin jasalmaq.
«Shet elderdegi qazaqtardy qoldaýǵa baǵyttalǵan zań qabyldanatyn bolady. Sonyń aiasynda «Qazaq kartasy» degen qujat jasalýy múmkin. Ol qujat syrttaǵy qazaqtarǵa qazaqstandyqtarmen birdei ómir súrýge múmkindik týǵyzady. Iaǵni, bilim alý, dárigerge qaralý, biznespen ainalysý, jumys isteý siiaqty barlyq ómir aspektilerinde Qazaqstan azamattarymen birdei quqyqqa ie bolady. Tek saiasatpen ainalysýǵa bolmaidy. Ol úshin azamattyq alýy qajet. «Qazaq kartasy» qolynda bar qazaq otbasymen bizdiń elde eshqandai vizasyz júrip-tura alady», - deidi Nurtai Ábiqaev.
Nurtai Ábiqaev «Qoǵamdyq qabyldaý» jobasy aiasynda sheteldik qazaqtarǵa arnalǵan biryńǵai bailanys ortalyǵy jumys istep turǵanyn aitty. «Bir tereze» qaǵidaty boiynsha jumys isteitin ortalyq arqyly 750-den astam aýyzsha ótinish túsken.
Eńbek jáne halyqty áleýmettik qorǵaý ministrliginiń kóshi qon protsesin monitoringileý basqarmasynyń basshysy Dastan Aitqulov «Qazaq kartasy» ázirge joba ekenin aitady.
«Dúniejúzi qazaqtary qaýymdastyǵy «Qazaq kartasyn» jasaý týraly usynys bergen bolatyn. Bul áli qarastyrylýda. Basqa elderde osyndai jaqsy tájiribeler bar. Sony bizge de paidalansaq degen nietten týyndap otyr. Negizgi maqsaty - shetelden Qazaqstanǵa kelýge daiyn emes qazaqtardyń beiimdelýine ýaqyt berý. Ázirge ol ýaqyttyń qansha merzimge beriletini naqtylanǵan joq», - deidi ministrlik ókili.
Sondai-aq, búgingi jiynda QR Eńbek jáne halyqty áleýmettik qorǵaý ministrligi, «Otandastar qory» KEAQ jáne «Dúniejúzi qazaqtary qaýymdastyǵy» RQB etnikalyq qazaqtardy jáne shetelde turatyn otandastardy qoldaýdy qamtamasyz etý maqsatynda ózara yntymaqtastyq jáne áriptestik qatynastardy nyǵaitý týraly Memorandýmǵa qol qoidy.
Qujatqa Eńbek jáne halyqty áleýmettik qorǵaý ministri Berdibek Saparbaev, «Otandastar qory» KEAQ prezidenti Nurtai Ábiqaev jáne Dúniejúzi qazaqtary qaýymdastyǵy tóraǵasynyń orynbasary Zaýytbek Turysbekov qol qoidy.
«Táýelsizdiktiń alǵashqy kúninen bastap Tuńǵysh Prezident - Elbasy N.Á.Nazarbaev shetelde turatyn etnikalyq qazaqtarǵa erekshe kóńil bólip keledi. Sonyń arqasynda osy jyldar ishinde bizdiń elimizdiń damýyna eleýli úles qosyp kele jatqan millionnan astam otandasymyz Qazaqstanǵa oraldy. Óz kezeginde, memleket olarǵa qolaily jaǵdai jasaidy, onyń ishinde jumysqa ornalastyrý, oqytý jáne materialdyq qoldaýlar bar. Shetelde tarihi otanyna oralǵysy keletin kóptegen otandastar turady. Sondyqtan da biz qazaq diasporasynyń áleýmettik-ekonomikalyq, mádeni jáne bilim berý qajettilikterin barynsha qanaǵattandyrýǵa baǵyttalǵan naqty sharalardy birlesip ázirleýimiz qajet», - dep atap ótti Berdibek Saparbaev.
«Qazaqtardyń 5-shi Dúniejúzilik quryltaiynda Ult Kóshbasshysy shetelde otandastarǵa memlekettik qoldaý kórsetý baǵyttaryn aiqyndady. Olardyń qatarynda etnikalyq qazaqtardy shetelde jan-jaqty qoldaý, Qazaqstanǵa kelgenderge qoldaý kórsetý, qazaq diasporasy boiynsha bizdiń jumysymyzdy zańnamalyq turǵydan súiemeldeý. Qysqa merzimde qazaq diasporasyn memlekettik qoldaý týraly Zań tujyrymdamasynyń jobasy ázirlendi. Memlekettik baǵdarlama men Qazaq diasporasyn memlekettik qoldaý týraly zań jobasyn ázirleý jalǵasýda», - dedi Nurtai Ábiqaev.
Memorandým qazaq diasporasymen mádeni-gýmanitarlyq bailanystardy damytýǵa járdemdesýdi, olardy ana tiline oqytý úshin jaǵdai jasaýdy, sheteldegi qazaq mádeni ortalyqtary men birlestikteriniń qyzmetin keńeitýdi kózdeidi.
Sondai-aq, memorandým aiasynda taraptar elge kelgen etnikalyq repatrianttar úshin qolaily jaǵdai jasaý, qazaq diasporasy týraly zańnamalyq akt ázirleý jáne otandastarǵa qolaily jaǵdai jasaý jáne beiimdeý úshin arnaiy baǵdarlamalar qabyldaý týraly ýaǵdalasty.
Memorandýmdy tiimdi júzege asyrý maqsatynda 2019 jylǵa arnalǵan birlesken is-sharalar jospary qabyldandy.
.jpeg)