Kásipqoi boks áleminde Qazaq laqap atymen tanymal boksshy Qanat Islam sharshy alańǵa qaita oralmaq. Bul jaiynda boksshynyń ózi málimdedi, dep habarlaidy QazAqparat.
«Qurmetti meniń jankúierlerim! Biz jekpe-jek jattyǵýlaryna qyzý daiyndyqtamyz. Inshalla, jaqynda jaqsy jańalyqtarmen bólisemiz. Sizderge Túrik elinen jalyndy sálem!», - dep jazdy Qanat Islam Instagram paraqshasynda.
Esterińizge sala ketsek, Qanat Islam (28-0, 22 KO) osy jyldyń 20 aqpanynda AQSh-tyń Florida shtatynyń Maiami qalasynda ótken aiqasta ekvadorlyq Djeison Mindýny (14-4-1, 8 KO) jetinshi raýndta nokaýtqa túsirgen bolatyn.
Sol kezde qazaqstandyq boksshynyń promoýteri Nelson Lopes The Ring-ke bergen suhbatynda Qanat Islamnyń kelesi eki jekpe-jegi osy jyldyń maýsym men qyrkúiek ailaryna josparlanǵan aitqan edi.
Al naýryz aiynda kásipqoi boks áleminiń insaidtary men jańalyqtaryn jariialap júrgen Boxing Media UK tvitter-akkaýntynda WBC nusqasy boiynsha diviziondaǵy álem chempiony, amerikandyq boksshy Djermall Charlonyń (31-0, 22 KO) áleýetti qarsylasy retinde Qanat Islamnyń da qarastyrylyp jatqany jazyldy.
