كەسٸپقوي بوكس ەلەمٸندە Qazaq لاقاپ اتىمەن تانىمال بوكسشى قانات يسلام شارشى الاڭعا قايتا ورالماق. بۇل جايىندا بوكسشىنىڭ ٶزٸ مەلٸمدەدٸ, دەپ حابارلايدى قازاقپارات.
«قۇرمەتتٸ مەنٸڭ جانكٷيەرلەرٸم! بٸز جەكپە-جەك جاتتىعۋلارىنا قىزۋ دايىندىقتامىز. ينشاللا, جاقىندا جاقسى جاڭالىقتارمەن بٶلٸسەمٸز. سٸزدەرگە تٷرٸك ەلٸنەن جالىندى سەلەم!», - دەپ جازدى قانات يسلام Instagram پاراقشاسىندا.
ەستەرٸڭٸزگە سالا كەتسەك, قانات يسلام (28-0, 22 كو) وسى جىلدىڭ 20 اقپانىندا اقش-تىڭ فلوريدا شتاتىنىڭ مايامي قالاسىندا ٶتكەن ايقاستا ەكۆادورلىق دجەيسون ميندۋنى (14-4-1, 8 كو) جەتٸنشٸ راۋندتا نوكاۋتقا تٷسٸرگەن بولاتىن.
سول كەزدە قازاقستاندىق بوكسشىنىڭ پروموۋتەرٸ نەلسون لوپەس The Ring-كە بەرگەن سۇحباتىندا قانات يسلامنىڭ كەلەسٸ ەكٸ جەكپە-جەگٸ وسى جىلدىڭ ماۋسىم مەن قىركٷيەك ايلارىنا جوسپارلانعان ايتقان ەدٸ.
ال ناۋرىز ايىندا كەسٸپقوي بوكس ەلەمٸنٸڭ ينسايدتارى مەن جاڭالىقتارىن جارييالاپ جٷرگەن Boxing Media UK تۆيتتەر-اككاۋنتىندا WBC نۇسقاسى بويىنشا ديۆيزيونداعى ەلەم چەمپيونى, امەريكاندىق بوكسشى دجەرمالل چارلونىڭ (31-0, 22 كو) ەلەۋەتتٸ قارسىلاسى رەتٸندە قانات يسلامنىڭ دا قاراستىرىلىپ جاتقانى جازىلدى.
