Foto: Qalleki teatry
Qalibek Qýanyshbaev atyndaǵy Qazaq ulttyq mýzykalyq drama teatry 86 jasqa qaraǵan shaǵynda qazaq teatr óneriniń maitalmany, Qazaqstannyń eńbek sińirgen qairatkeri, «Qurmet» ordeniniń iegeri Rymkesh Omarhanovanyń dúnieden ótkenin habarlady, dep jazady Ult.kz.
Teatr ujymy aq samaily aktrisanyń týǵan-týystary men jaqyndaryna qaiǵyra kóńil aitty.
Rymkesh Omarhanqyzy — qazaq sahna óneriniń damýyna jarty ǵasyrdan astam ýaqytyn arnaǵan dara tulǵa. Ol 150-den astam ról somdap, ulttyq teatrdyń altyn qoryn baiytqan. Shyǵarmashylyq jolyn Qaraǵandydaǵy S.Seifýllin atyndaǵy teatrdan bastap, keiin elordadaǵy Qalibek Qýanyshbaev atyndaǵy teatrdyń qurylýyna úlken úles qosty.
Aktrisanyń Maqpal (Ǵ. Músirepov «Qozy Kórpesh – Baian Sulý»), Tólegenniń anasy («Qyz Jibek»), Mórjan (M. Áýezov «Qaragóz»), Eńlik («Eńlik–Kebek»), Tańqybike («Túngi saryn»), Tolǵanai (Sh. Aitmatov «Ana–Jer–Ana»), Katerina (A. Ostrovskii «Naizaǵai»), Djýletta (Ý. Shekspir «Romeo men Djýletta»), Biǵaisha (T. Ahtanov «Kúshik kúieý»), Ganna (A. Dýdarev «Kesh») syndy rólderi kórermen júreginde saqtalyp qaldy.
Teatr ujymy Rymkesh Omarhanovanyń esimi men óshpes murasy qazaq mádenietinde máńgilikke ulyqtalatynyn atap ótti.
