Sheshenstan basshysy Ramzan Qadyrov sheshen azamattarynyń Siriiada Resei qorǵanys ministrliginiń áskeri politsiia batalony quramynda qyzmet etip júrgenin rastady. Bul jaiynda ol óziniń Instagram-daǵy paraqshasynda jazdy.
Qadyrov buǵan deiin Siriiaǵa sheshen azamattarynyń jiberilgeni týraly aqpardy joqqa shyǵaryp kelgen edi.
Jeltoqsannyń basynda "Izvestiia" jáne "Kommersant" basylymdary qorǵanys ministrligindegi derekkózderine silteme jasap, "sheshen arnaiy jasaǵynyń" eki batalony Resei áskerileri men aviatsiiasy ornalasqan Siriianyń Hmeimim áýe bazasyn kúzetýge jiberilgenin habarlaǵan. "Kavkaz. Realii" jobasy Hankaladaǵy Resei bazasynan Siriiaǵa jóneltilýge daiyndalyp jatqan arnaiy jasaq sarbazdary delingen video jariialaǵan.
Keiin "Novaia gazeta" basylymy jaǵdaimen tanys derekkózine silteme jasap, Sheshenstan biligine Siriiaǵa jóneltetin eki batalon qurýǵa tapsyrma berilgenin, al oǵan jaýapty adam retinde Memlekettik dýma depýtaty Adam Delimhanov taǵaiyndalǵanyn habarlaǵan. Qańtardyń basynda basylym sheshen áskerilerine arnalǵan Siriiaǵa qatysty qurlyqtaǵy operatsiialar kezinde oryndaý qajet keńesteri bar kitapsha jariialaǵan.
