Belgiialyq Janssen (Johnson & Johnson brendine tiesili) kompaniiasy jasap jatqan koronavirýsqa qarsy ekpesiniń bir dozasy synaq kezinde 66 paiyz tiimdilik kórsetken. Bul týraly kompaniia 29 qańtarda habarlady, dep jazady Azattyq.
Janssen farmatsevtikalyq kompaniiasynyń málimetinshe, halyqaralyq synaqqa qatysqan 44 myńdai adamnyń ishinde eshkim aýrýhanaǵa túspegen, qaitys bolǵandar da joq. Synaqqa qatysqan 468 adamǵa virýs juqqan.
Kompaniia ekpeniń bir dozasynyń ózi koronavirýstan jaqsy qorǵaidy dep málimdedi. Qazir Janssen eki dozanyń qanshalyqty tiimdi bolatynyn tekserip jatyr. Biraq bul vaktsina Ońtústik Afrika mýtatsiiasyna qarsy tiimdiligi sál tómen – 57 paiyz.
Janssen biyl bir milliard doza shyǵarýdy josparlap otyr. AQSh bul kompaniiaǵa aldyn ala 100 million dozaǵa, Kanada 38 million dozaǵa, Ulybritaniia 30 million dozaǵa tapsyrys berip qoiǵan.
29 qańtarda AQSh-tyń Novavax kompaniiasy daiyndap jatqan ekpesiniń Ulybritaniiadaǵy synaǵy 89,3 paiyz tiimdilik kórsetkenin málimdedi. Synaqtyń úsh kezeńinen keiin bul ekpe virýstyń ulybritaniialyq mýtatsiiasynan da qorǵai alatynyn kórsetken. Úshinshi synaq kezeńine 18-84 jastaǵy 15 myń adam qatysqan. Synaq ekpesin alǵandardyń 27 paiyzy – 65 jastan úlken adamdar. Novavax ekpesi eki dozadan turady. Bul vaktsina Ońtústik Afrika mýtatsiiasyna qarsy 60 paiyz tiimdilik kórsetken.
Álemde Janssen men Novavax ekpesi úshinshi synaq kezeńinen ótip, nátijesin resmi túrde jariialaǵan bes vaktsinanyń qataryna endi. Buǵan deiin Pfizer/BioNTech (AQSh/Germaniia), Moderna (AQSh), Oxford/AstraZeneca (Ulybritaniia) ekpeleri synaq kezinde joǵary tiimdilik kórsetken. Bul úsh ekpe álemniń biraz elinde, sonyń ishinde AQSh pen Eýropada maquldanyp, halyqqa salynyp jatyr.
- Pfizer/BioNTech ekpesiniń tiimdiligi 95 paiyz dep habarlandy. Ekinshi dozany 21 kúni salý kerek. Vaktsinany -70 gradýsta saqtaý kerek. Bul – ekpeniń eń úlken minýsy. Pfizer/BioNTech ekpesin Dúniejúzilik densaýlyq saqtaý uiymy maquldaǵan.
- Moderna vaktsinasynyń tiimdiligi 95 paiyz dep jariialandy. Ekinshi dozany 28 kúni salý qajet. Ekpeni -20 gradýsta 6 apta saqtaýǵa bolady.
- Oxford/AstraZeneca vaktsinasynyń tiimdiligi 62-90 paiyz dep jariialandy. Ekinshi dozany 4-12 aptanyń ishinde salý qajet. Ekpeni qoldanystaǵy tońazytqyshta, 2-8 gradýs salqynda saqtaý kerek.
Budan bólek, Reseidiń "Spýtnik V" ekpesi de birneshe elde halyqqa jappai salynyp jatyr. Bul vaktsinanyń úshinshi synaq kezeńiniń nátijesi jariialanbaǵan. Biraq Resei biligi jeltoqsanda "Spýtnik V" ekpesiniń 92 paiyz tiimdilik kórsetkenin habarlaǵan. Qazaqstan biligi 1 aqpannan bastap halyqqa "Spýtnik V" ekpesin salmaq.
