Izrail aviatsiiasy Hamas radikaldy qozǵalysynyń Gaza sektoryndaǵy áskeri nysandaryna shabýyl jasady. Áskeriler muny uiymnyń Izrail aýmaǵyn atqylaýyna "jaýap" retinde atady. Buǵan qosa, olardyń sózinshe, eldiń ońtústiginde jarylǵysh zattary bar áýe sharlary tabylǵan.
AQSh prezidenti Donald Tramp Izrail men Palestina avtonomiiasy arasyndaǵy qaqtyǵysty retteýdiń jolyn usynǵannan keiin Taiaý Shyǵystaǵy jaǵdai qaita ýshyqqan. Tramp Iordan ózeniniń batys jaǵalaýyndaǵy aýmaqtyń bir bóligi men Gaza sektorynda palestindik táýelsiz memleket qurýdy usynǵan. Qujatta Ierýsalim Izraildiń ajyramas bóligi retinde kórsetilgen.
Donald Tramp óziniń usynysyn "ǵasyr kelisimi" dep ataǵan. Izrail biligi ony qoldaǵanmen Palestina avtonomiiasynyń jetekshisi mundai sharttardy eshqashan qabyldamaitynyn aitqan.
The Washington Post gazetiniń jazýynsha, Tramp ákimshiligi áý basta-aq Abbastyń "ǵasyrlyq kelisimdi" qabyldamaitynyn bilgenin, qujattyń negizgi maqsaty elde ishki saiasi daǵdarys jalǵasyp jatqan tusta Izraildi qoldaý bolǵanyn jazǵan.
