Iran jaqyn kúnderi ǵylymi zertteý spýtnigin ǵaryshqa shyǵarýdy josparlap otyrǵanyn rastady. AFP agenttigine bergen suhbatynda Irannyń ulttyq ǵarysh agenttiginiń basshysy Morteza Berari degenmen Zafar (parsy tilinen aýdarǵanda "jeńis") spýtnigin naqty qashan ushyratynyn aitpady. Onyń aitýynsha, 113 kilo salmaǵy bar spýtnik Simorgh zymyran-tasyǵyshymen ushyrylady jáne Jerden 530 shaqyrym qashyqtyqta ornalasyp, kúnine 15 ret ainalady.
Beraridiń aitýynsha, spýtnikti qurastyrý jumysy úsh jyl buryn bastalǵan. Oǵan 80 irandyq ǵalym qatysqan. 18 aidan astam ýaqyt jumys isteidi. Onyń negizgi mindeti - jer silkinisi, tabiǵat apattaryn zertteý men aýyl sharýashylyǵy resýrstaryn damytý.
Bes kún buryn Irannyń ǵaryshqa spýtnik ushyrýǵa daiyndalyp jatqany týraly habarlama tarap, spýtniktiń sýreti de paida bolǵan. Byltyr Iran úsh ret jasandy serik ushyryp, úsheýi de sátsiz aiaqtalǵan. Keibir Batys elderi Irandy spýtnik ushyrýda ballistikalyq zymyrandy qurastyrý úshin qoldanylatyn tehnologiiany paidalanady dep aiyptaidy. Berari aqparat agenttigine Iran "ǵaryshty beibit paidalanýdy" qoldaidy dep aitqan.
"Biz ǵarysh salasynda barlyq jumysty ashyq atqaryp jatyrmyz" dedi Morteza Berari.
Ótken jyly qańtar jáne aqpan ailarynda Paiiam jáne Dýsti ("Dostyq") spýtnikterin ushyrý sátsiz aiaqtalyp, tamyz aiynda spýtnikti ushyrý kezinde ǵarysh ailaǵynda zymyran jarylǵan.
