يران جاقىن كٷندەرٸ عىلىمي زەرتتەۋ سپۋتنيگٸن عارىشقا شىعارۋدى جوسپارلاپ وتىرعانىن راستادى. AFP اگەنتتٸگٸنە بەرگەن سۇحباتىندا يراننىڭ ۇلتتىق عارىش اگەنتتٸگٸنٸڭ باسشىسى مورتەزا بەراري دەگەنمەن زافار (پارسى تٸلٸنەن اۋدارعاندا "جەڭٸس") سپۋتنيگٸن ناقتى قاشان ۇشىراتىنىن ايتپادى. ونىڭ ايتۋىنشا, 113 كيلو سالماعى بار سپۋتنيك Simorgh زىمىران-تاسىعىشىمەن ۇشىرىلادى جەنە جەردەن 530 شاقىرىم قاشىقتىقتا ورنالاسىپ, كٷنٸنە 15 رەت اينالادى.
بەراريدٸڭ ايتۋىنشا, سپۋتنيكتٸ قۇراستىرۋ جۇمىسى ٷش جىل بۇرىن باستالعان. وعان 80 يراندىق عالىم قاتىسقان. 18 ايدان استام ۋاقىت جۇمىس ٸستەيدٸ. ونىڭ نەگٸزگٸ مٸندەتٸ - جەر سٸلكٸنٸسٸ, تابيعات اپاتتارىن زەرتتەۋ مەن اۋىل شارۋاشىلىعى رەسۋرستارىن دامىتۋ.
بەس كٷن بۇرىن يراننىڭ عارىشقا سپۋتنيك ۇشىرۋعا دايىندالىپ جاتقانى تۋرالى حابارلاما تاراپ, سپۋتنيكتٸڭ سۋرەتٸ دە پايدا بولعان. بىلتىر يران ٷش رەت جاساندى سەرٸك ۇشىرىپ, ٷشەۋٸ دە سەتسٸز اياقتالعان. كەيبٸر باتىس ەلدەرٸ يراندى سپۋتنيك ۇشىرۋدا بالليستيكالىق زىمىراندى قۇراستىرۋ ٷشٸن قولدانىلاتىن تەحنولوگييانى پايدالانادى دەپ ايىپتايدى. بەراري اقپارات اگەنتتٸگٸنە يران "عارىشتى بەيبٸت پايدالانۋدى" قولدايدى دەپ ايتقان.
"بٸز عارىش سالاسىندا بارلىق جۇمىستى اشىق اتقارىپ جاتىرمىز" دەدٸ مورتەزا بەراري.
ٶتكەن جىلى قاڭتار جەنە اقپان ايلارىندا پاييام جەنە دۋستي ("دوستىق") سپۋتنيكتەرٸن ۇشىرۋ سەتسٸز اياقتالىپ, تامىز ايىندا سپۋتنيكتٸ ۇشىرۋ كەزٸندە عارىش ايلاعىندا زىمىران جارىلعان.
