11 qańtarda tańerteń irandyq memlekettik telearna arqyly málimdeme jasaǵan Iran qarýly kúshteriniń bas shtaby osylai dedi. Buǵan deiin Iran úkimeti birneshe kún boiy batys jetekshileri men sarapshylarynyń "ushaqty irandyq zymyran atyp túsirdi" degen málimdemesin joqqa shyǵaryp kelgen edi.
Irannyń Syrtqy ister ministri Djavad Zarif oqiǵa 8 qańtarda "AQSh-tyń soqyr táýekelshildiginen týyndaǵan daǵdarys kezinde" boldy dedi.
Al, keiinirek el Prezidenti Hasan Roýhani "orny tolmas bul qatelik úshin kináliler qylmystyq jaýapqa tartylatynyn" aitty.
Sondai-aq, ol adamnyń qateliginen Ýkraina ushaǵynyń qulaǵanyna ókinetinin jetkizdi.
«Ókinishke qarai, adam faktory men qate iske qosylǵan zymyrannyń kesirinen ushaq úlken apatqa ushyrady. Men Irannyń Prezidenti retinde osy apattyń saldarynan mert bolǵandardyń otbasylary men jaqyndaryna kóńil aitamyn» delingen habarlamada.
Prezidenttiń aitýynsha, Iran Syrtqy ister ministrligi mert bolǵan azamattardyń máiitterin otbasylaryna jetkizý úshin qoldan kelgenniń barlyǵyn jasaidy.
«Sonymen qatar áýe qorǵanysy kúshteri keshenderiniń barlyq álsiz tustary joiylyp, mundai áýe apattarynyń ekinshi qaitalanbaýyna qajetti barlyq sharalar qolǵa alynsyn», - dedi Iran basshysy.
Aita keteiik, "Ýkrainanyń halyqaralyq áýe jelisi" kompaniiasyna tiesili ushaq Tegerannan Kievke ushqan. Ushaqta Kanadanyń - 57, Irannyń - 82, Aýǵanstannyń - 4, Germaniianyń - 3, Ulybritaniianyń - 3, Ýkrainanyń - 11 azamaty bolǵan.
