11 قاڭتاردا تاڭەرتەڭ يراندىق مەملەكەتتٸك تەلەارنا ارقىلى مەلٸمدەمە جاساعان يران قارۋلى كٷشتەرٸنٸڭ باس شتابى وسىلاي دەدٸ. بۇعان دەيٸن يران ٷكٸمەتٸ بٸرنەشە كٷن بويى باتىس جەتەكشٸلەرٸ مەن ساراپشىلارىنىڭ "ۇشاقتى يراندىق زىمىران اتىپ تٷسٸردٸ" دەگەن مەلٸمدەمەسٸن جوققا شىعارىپ كەلگەن ەدٸ.
يراننىڭ سىرتقى ٸستەر مينيسترٸ دجاۆاد زاريف وقيعا 8 قاڭتاردا "اقش-تىڭ سوقىر تەۋەكەلشٸلدٸگٸنەن تۋىنداعان داعدارىس كەزٸندە" بولدى دەدٸ.
ال, كەيٸنٸرەك ەل پرەزيدەنتٸ حاسان روۋحاني "ورنى تولماس بۇل قاتەلٸك ٷشٸن كٸنەلٸلەر قىلمىستىق جاۋاپقا تارتىلاتىنىن" ايتتى.
سونداي-اق, ول ادامنىڭ قاتەلٸگٸنەن ۋكراينا ۇشاعىنىڭ قۇلاعانىنا ٶكٸنەتٸنٸن جەتكٸزدٸ.
«ٶكٸنٸشكە قاراي, ادام فاكتورى مەن قاتە ٸسكە قوسىلعان زىمىراننىڭ كەسٸرٸنەن ۇشاق ٷلكەن اپاتقا ۇشىرادى. مەن يراننىڭ پرەزيدەنتٸ رەتٸندە وسى اپاتتىڭ سالدارىنان مەرت بولعانداردىڭ وتباسىلارى مەن جاقىندارىنا كٶڭٸل ايتامىن» دەلٸنگەن حابارلامادا.
پرەزيدەنتتٸڭ ايتۋىنشا, يران سىرتقى ٸستەر مينيسترلٸگٸ مەرت بولعان ازاماتتاردىڭ مەيٸتتەرٸن وتباسىلارىنا جەتكٸزۋ ٷشٸن قولدان كەلگەننٸڭ بارلىعىن جاسايدى.
«سونىمەن قاتار ەۋە قورعانىسى كٷشتەرٸ كەشەندەرٸنٸڭ بارلىق ەلسٸز تۇستارى جويىلىپ, مۇنداي ەۋە اپاتتارىنىڭ ەكٸنشٸ قايتالانباۋىنا قاجەتتٸ بارلىق شارالار قولعا الىنسىن», - دەدٸ يران باسشىسى.
ايتا كەتەيٸك, "ۋكراينانىڭ حالىقارالىق ەۋە جەلٸسٸ" كومپانيياسىنا تيەسٸلٸ ۇشاق تەگەراننان كيەۆكە ۇشقان. ۇشاقتا كانادانىڭ - 57, يراننىڭ - 82, اۋعانستاننىڭ - 4, گەرمانييانىڭ - 3, ۇلىبريتانييانىڭ - 3, ۋكراينانىڭ - 11 ازاماتى بولعان.
