«Orny tolmas bul qatelik úshin kináliler qylmystyq jaýapqa tartylady», dep málimdedi Iran Prezidenti Hasan Roýhani senbi kúni.
Bul týraly Irannyń Irna agenttigi habarlady.
Ol adamnyń qateliginen Ýkraina ushaǵynyń qulaǵanyna ókinetinin aitty.
«Ókinishke qarai, adam faktory men qate iske qosylǵan zymyrannyń kesirinen ushaq úlken apatqa ushyrady. Men Irannyń Prezidenti retinde osy apattyń saldarynan mert bolǵandardyń otbasylary men jaqyndaryna kóńil aitamyn» delingen habarlamada.
Prezidenttiń aitýynsha, Iran Syrtqy ister ministrligi mert bolǵan azamattardyń máiitterin otbasylaryna jetkizý úshin qoldan kelgenniń barlyǵyn jasaidy.
«Sonymen qatar áýe qorǵanysy kúshteri keshenderiniń barlyq álsiz tustary joiylyp, mundai áýe apattarynyń ekinshi qaitalanbaýyna qajetti barlyq sharalar qolǵa alynsyn», - dedi Iran basshysy.
Osyǵan deiin Iranda 167 jolaýshysy bar Ýkraina ushaǵy qulaǵany týraly habarlanǵan bolatyn.
Artynan Qazaqstannyń Syrtqy ister ministrligi ushaqta Qazaqstan azamattarynyń joq ekenin habarlady.
Tegeranda qulaǵan Ýkraina ushaǵyndaǵy jolaýshylardyń barlyǵy mert bolǵany anyqtaldy.
Kanada premer-ministri Iran jolaýshylar lainerin abaisyzda atyp jiberý múmkin degen boljamyn jariialady.
Búgin Irna aqparat agenttigi Irannyń áýe qorǵanys kúshteri Ýkraina ushaǵyn qatelesip atyp túsirdi degen aqparat taratty.
