«ورنى تولماس بۇل قاتەلٸك ٷشٸن كٸنەلٸلەر قىلمىستىق جاۋاپقا تارتىلادى», دەپ مەلٸمدەدٸ يران پرەزيدەنتٸ حاسان روۋحاني سەنبٸ كٷنٸ.
بۇل تۋرالى يراننىڭ يرنا اگەنتتٸگٸ حابارلادى.
ول ادامنىڭ قاتەلٸگٸنەن ۋكراينا ۇشاعىنىڭ قۇلاعانىنا ٶكٸنەتٸنٸن ايتتى.
«ٶكٸنٸشكە قاراي, ادام فاكتورى مەن قاتە ٸسكە قوسىلعان زىمىراننىڭ كەسٸرٸنەن ۇشاق ٷلكەن اپاتقا ۇشىرادى. مەن يراننىڭ پرەزيدەنتٸ رەتٸندە وسى اپاتتىڭ سالدارىنان مەرت بولعانداردىڭ وتباسىلارى مەن جاقىندارىنا كٶڭٸل ايتامىن» دەلٸنگەن حابارلامادا.
پرەزيدەنتتٸڭ ايتۋىنشا, يران سىرتقى ٸستەر مينيسترلٸگٸ مەرت بولعان ازاماتتاردىڭ مەيٸتتەرٸن وتباسىلارىنا جەتكٸزۋ ٷشٸن قولدان كەلگەننٸڭ بارلىعىن جاسايدى.
«سونىمەن قاتار ەۋە قورعانىسى كٷشتەرٸ كەشەندەرٸنٸڭ بارلىق ەلسٸز تۇستارى جويىلىپ, مۇنداي ەۋە اپاتتارىنىڭ ەكٸنشٸ قايتالانباۋىنا قاجەتتٸ بارلىق شارالار قولعا الىنسىن», - دەدٸ يران باسشىسى.
وسىعان دەيٸن يراندا 167 جولاۋشىسى بار ۋكراينا ۇشاعى قۇلاعانى تۋرالى حابارلانعان بولاتىن.
ارتىنان قازاقستاننىڭ سىرتقى ٸستەر مينيسترلٸگٸ ۇشاقتا قازاقستان ازاماتتارىنىڭ جوق ەكەنٸن حابارلادى.
تەگەراندا قۇلاعان ۋكراينا ۇشاعىنداعى جولاۋشىلاردىڭ بارلىعى مەرت بولعانى انىقتالدى.
كانادا پرەمەر-مينيسترٸ يران جولاۋشىلار لاينەرٸن ابايسىزدا اتىپ جٸبەرۋ مٷمكٸن دەگەن بولجامىن جارييالادى.
بٷگٸن يرنا اقپارات اگەنتتٸگٸ يراننىڭ ەۋە قورعانىس كٷشتەرٸ ۋكراينا ۇشاعىن قاتەلەسٸپ اتىپ تٷسٸردٸ دەگەن اقپارات تاراتتى.
