Iordaniiada premer-ministr Bisher ál-Hasaýna basqaratyn úkimettiń jańa quramy bekitildi, dep habarlaidy "Ult aqparat" PETRA agenttigine silteme jasap.
Dúisenbi kúni Koroldiń buiryǵymen Bashir ál Hasaýna premer-ministr men qorǵanys ministri qyzmetine taǵaiyndaldy. Jańartylǵan ministrler kabineti Ál Hýseiniia saraiynda Korol II Abdallanyń aldynda ant berdi.
Al koronavirýsqa shaldyqqan jańa úkimettiń múshesi – Mahmýt Harabsheh karantinnen keiin ant beredi.
Saltanatty sharaǵa Koroldiń uly – murager hanzada Hýsein jáne Hashimit Koroldigi sotynyń tóraǵasy Iýsef Issavi qatysty.
Premer-ministr ekonomikalyq turaqtylyqty arttyrý, kedeilik pen jumyssyzdyqpen kúresýdiń mańyzdylyǵyn atap ótti. Sondai-aq qyzmet kórsetý, densaýlyq saqtaý salalaryn jaqsartyp, pandemiianyń týristik salaǵa tigizgen zardabyn jeńildetýge ýáde berdi.
Eske sala ketsek, aidyń basynda Korol Abdalla II burynǵy premer-ministr Omar Razzazdy qyzmetinen bosatyp, 27 qyrkúiek kúni Palatany taratty. Sondai-aq úkimetke jalpyǵa ortaq sailaý uiymdastyrýdy tapsyrdy. Ol 10 qarashada ótedi dep josparlanǵan.
