Bellingcat toby jáne The Insider basylymy jańa zertteý jariialap, reseilik oppozitsiialyq saiasatker Aleksei Navalnyidy ýlaýǵa qatysy bar FSB qyzmetkerleriniń taǵy úsh adamnyń ólimine qatysy bolýy múmkin degen tujyrym jasady.
Zertteý toby birneshe jyl buryn jumbaq jaǵdaida qaitys bolǵan jýrnalist Timýr Kýashev, belsendi Rýslan Magomedragimov jáne "Novaia Rossiia" qozǵalysynyń jetekshisi Nikita Isaevtyń ólimine Navalnyiǵa "qastandyq uiymdastyrdy" delingen FSB-nyń kriminalistika institýty ókilderi kináli dep sanaidy.
Jýrnalist Timýr Kýashevtiń denesi 2014 jyly tamyz aiynda Nalchik qalasyndaǵy orman mańynan tabylǵan. Tergeý komiteti alǵashynda onyń denesinen inektsiia izderi tabyldy dep málimdegen. Biraq eki jyldan soń jýrnalistiń aǵzasynan qaýipti zat tabylmady dep habarlady. Bellingcat zertteý barysynda Kýashevke "qastandyq jasalmai turyp" 2014 jyly shilde aiynda Kabardin-Balqar respýblikasyna Konstantin Kýdriavtsev (Aleksei Navalnyimen telefonmen sóilesip, oǵan qastandyq uiymdastyrǵanyn moiyndaǵan FSB qyzmetkeri) pen FSB ókili Ivan Osipov (Bellingcat ony FSB-nyń joǵary laýazymdy qyzmetkeri dep ataidy) jáne taǵy birneshe qyzmetker attanǵan. Sol kúni Kýashev júrip ótken jerlerde baqylaý kameralary "tehnikalyq sebeppen" óshirilgen.
Zertteý toby osyndai retpen taǵy eki adam ólimindegi FSB qyzmetkerleriniń rólin saraptap, olardyń úsh adam ólimine qatysy bar degen qorytyndyǵa kelgen.
- Bellingcat, The Insider, Der Spiegel jáne CNN 14 jeltoqsanda jariialaǵan zertteýinde Aleksei Navalnyidyń ýlanýyna FSB-nyń qatysy bar dep tujyrym jasaǵan. FSB qyzmetkerleriniń ushý baǵytyn, telefon áńgimeleri derekterin zerttegen jýrnalister FSB qyzmetkerleri 2017 jyldan beri Aleksei Navalnyidy ańdyǵan dep tujyrymdaǵan. Dál sol jyly Navalnyi prezident sailaýyna túsetinin málimdegen.
- Resei biligi oppozitsionerdiń ýlanýyna qatysy joǵyn aitady. Jaqynda Pýtin Navalnyidy "ýlaǵymyz kelse, aiaǵyna deiin jetkizer edik" dep málimdegen.
- FSB zertteýdi "FSB men qyzmetkerleriniń atyna kir keltirý úshin uiymdastyrylǵan josparly arandatý áreketi" dep atady.
