Bellingcat توبى جەنە The Insider باسىلىمى جاڭا زەرتتەۋ جارييالاپ, رەسەيلٸك وپپوزيتسييالىق ساياساتكەر الەكسەي ناۆالنىيدى ۋلاۋعا قاتىسى بار فسب قىزمەتكەرلەرٸنٸڭ تاعى ٷش ادامنىڭ ٶلٸمٸنە قاتىسى بولۋى مٷمكٸن دەگەن تۇجىرىم جاسادى.
زەرتتەۋ توبى بٸرنەشە جىل بۇرىن جۇمباق جاعدايدا قايتىس بولعان جۋرناليست تيمۋر كۋاشەۆ, بەلسەندٸ رۋسلان ماگومەدراگيموۆ جەنە "نوۆايا روسسييا" قوزعالىسىنىڭ جەتەكشٸسٸ نيكيتا يساەۆتىڭ ٶلٸمٸنە ناۆالنىيعا "قاستاندىق ۇيىمداستىردى" دەلٸنگەن فسب-نىڭ كريميناليستيكا ينستيتۋتى ٶكٸلدەرٸ كٸنەلٸ دەپ سانايدى.
جۋرناليست تيمۋر كۋاشەۆتٸڭ دەنەسٸ 2014 جىلى تامىز ايىندا نالچيك قالاسىنداعى ورمان ماڭىنان تابىلعان. تەرگەۋ كوميتەتٸ العاشىندا ونىڭ دەنەسٸنەن ينەكتسييا ٸزدەرٸ تابىلدى دەپ مەلٸمدەگەن. بٸراق ەكٸ جىلدان سوڭ جۋرناليستٸڭ اعزاسىنان قاۋٸپتٸ زات تابىلمادى دەپ حابارلادى. Bellingcat زەرتتەۋ بارىسىندا كۋاشەۆكە "قاستاندىق جاسالماي تۇرىپ" 2014 جىلى شٸلدە ايىندا كاباردين-بالقار رەسپۋبليكاسىنا كونستانتين كۋدرياۆتسەۆ (الەكسەي ناۆالنىيمەن تەلەفونمەن سٶيلەسٸپ, وعان قاستاندىق ۇيىمداستىرعانىن مويىنداعان فسب قىزمەتكەرٸ) پەن فسب ٶكٸلٸ يۆان وسيپوۆ (Bellingcat ونى فسب-نىڭ جوعارى لاۋازىمدى قىزمەتكەرٸ دەپ اتايدى) جەنە تاعى بٸرنەشە قىزمەتكەر اتتانعان. سول كٷنٸ كۋاشەۆ جٷرٸپ ٶتكەن جەرلەردە باقىلاۋ كامەرالارى "تەحنيكالىق سەبەپپەن" ٶشٸرٸلگەن.
زەرتتەۋ توبى وسىنداي رەتپەن تاعى ەكٸ ادام ٶلٸمٸندەگٸ فسب قىزمەتكەرلەرٸنٸڭ رٶلٸن ساراپتاپ, ولاردىڭ ٷش ادام ٶلٸمٸنە قاتىسى بار دەگەن قورىتىندىعا كەلگەن.
- Bellingcat, The Insider, Der Spiegel جەنە CNN 14 جەلتوقساندا جارييالاعان زەرتتەۋٸندە الەكسەي ناۆالنىيدىڭ ۋلانۋىنا فسب-نىڭ قاتىسى بار دەپ تۇجىرىم جاساعان. فسب قىزمەتكەرلەرٸنٸڭ ۇشۋ باعىتىن, تەلەفون ەڭگٸمەلەرٸ دەرەكتەرٸن زەرتتەگەن جۋرناليستەر فسب قىزمەتكەرلەرٸ 2017 جىلدان بەرٸ الەكسەي ناۆالنىيدى اڭدىعان دەپ تۇجىرىمداعان. دەل سول جىلى ناۆالنىي پرەزيدەنت سايلاۋىنا تٷسەتٸنٸن مەلٸمدەگەن.
- رەسەي بيلٸگٸ وپپوزيتسيونەردٸڭ ۋلانۋىنا قاتىسى جوعىن ايتادى. جاقىندا پۋتين ناۆالنىيدى "ۋلاعىمىز كەلسە, اياعىنا دەيٸن جەتكٸزەر ەدٸك" دەپ مەلٸمدەگەن.
- فسب زەرتتەۋدٸ "فسب مەن قىزمەتكەرلەرٸنٸڭ اتىنا كٸر كەلتٸرۋ ٷشٸن ۇيىمداستىرىلعان جوسپارلى ارانداتۋ ەرەكەتٸ" دەپ اتادى.
