Infliatsiiany tejep, baǵalardy ustap turý úshin qosymsha is-sharalardy ázirleý qajet. Bul týraly Úkimet otyrysynda QR Premer-Ministri Álihan Smaiylov aitty, dep habarlaidy QazAqparat.
«Qazirgidei kúrdeli kezeńde ekonomikanyń ósý qarqynyn saqtai otyryp, ári qarai jedeldetý – asa mańyzdy mindet. Halyqtyń tabysyn arttyrý, jumys oryndaryn qurý jáne ekonomikany ártaraptandyrý jumystaryn barynsha kúsheitý qajet. Bul úshin Memleket basshysynyń tapsyrmasyna sáikes Úkimet 2022 jylǵa arnalǵan Is-qimyl baǵdarlamasyn iske asyrýda. Sondai-aq, Halyqtyń tabysyn arttyrý baǵdarlamasy ázirlendi. Memlekettik organdardyń birinshi basshylary men ákimderge osy qujattardaǵy is-sharalardyń sapaly jáne tiimdi oryndalýyn qatań baqylaýǵa alýdy tapsyramyn», - dedi Álihan Smaiylov.
Sonymen qatar, Úkimet basshysy ákimder áleýmettik mańyzy bar azyq-túlik taýarlarynyń baǵasyn turaqtandyrýǵa erekshe kóńil bólýi tiistigin, ol úshin qajetti mehanizmderdiń barlyǵy bar ekendigin basa aitty.
«Sondai-aq naryqtaǵy qubylmaly jaǵdaidy eskere otyryp, Ulttyq ekonomika ministrligi múddeli memlekettik organdar jáne ákimdiktermen birge infliatsiiany tejep, baǵalardy ustap turý úshin qosymsha is-sharalardy ázirleýi qajet. Qazirgi jaǵdaida iskerlik belsendilikti ári qarai damytý úshin indýstriialandyrý jumystaryn tiimdi júrgizýdiń, ekonomikaǵa, ásirese, shikizattyq emes sektorǵa ishki jáne syrtqy investitsiialardy tartýdyń, sondai-aq shaǵyn jáne orta biznesti damytýdyń mańyzy zor. Indýstriia, Aýyl sharýashylyǵy, Ulttyq ekonomika ministrlikteri men ákimdikter bul jumysty airyqsha baqylaýda ustaýy qajet», - dedi Premer-Ministr.
