Álemdegi jappai qymbatshylyq Qazaqstannyń memlekettik baǵaly qaǵazdarynyń kiristiligine de áser etken. QR Ulttyq bankiniń tóraǵasy Ǵalymjan Pirmatov Úkimet otyrysynda osyndai málimet berdi, dep habarlaidy QazAqparat.
«Infliatsiianyń syrtqy jáne ishki faktorlary baǵanyń ósý jaǵyna qarai qysymdy kúsheitip keledi. Álemde infliatsiialyq qysym geosaiasi shielenistiń saldarynan kúsheiip otyr. Ol jait taýar jetkizilimindegi problemalardy ýshyqtyra tústi.
Azyq-túliktiń álemdik baǵasy joǵary deńgeide saqtalyp otyr. Shikizat pen materialdar quny turaqty túrde óskendikten, daiyn ónim de jappai qymbattady», - dedi Ulttyq bank basshysy.
Onyń málimeti boiynsha, memlekettik baǵaly qaǵazdardyń kiristiligi ósken. Sondai-aq ol AQSh Federaldy rezerv júiesinen keiin Eýropa ortalyq banki de shilde aiynda mólsherlemelerdi kóterýi múmkin ekenin atap ótti.
«Naryqtyń boljamdary boiynsha, Eýropa Ortalyq bankiniń depozit mólsherlemesin 2022 jyldyń sońyna qarai -0,5%-dan oń mánge deiin, al 2023 jyly 1%-dan joǵary kóteredi. Angliianyń ortalyq banki mamyrda mólsherlemeni 25 bazistik tarmaqqa 1%-ǵa deiin kóterdi.
Infliatsiialyq boljamdardyń uzaq ýaqyt boiy maqsattan aýytqý qaýpi ortalyq bankterdi monetarlyq saiasatty agressivti túrde kúsheitýge itermeleidi.
Geosaiasi táýekelderdiń oryn alýy jáne AQSh Federaldy Rezerv Júiesiniń monetarlyq saiasatty kúsheitýi jyl basynan beri AQSh dollary indeksiniń 7,6%-ǵa ósýine sebep boldy», - dedi Ǵalymjan Pirmatov.
