Jańa Úkimetti infliatsiiaǵa qarsy jumys tásilin qaita qaraýy kerek. Bul týraly Májilistiń jalpy otyrysynda depýtat Aiqyn Qońyrov málim etti, dep habarlaidy QazAqparat.
«2021 jyldyń qorytyndysyn jariialaǵanda memlekettik organdar eldegi azyq-túlik infliatsiiasynyń deńgeii edáýir tómendetilgenin málimdedi. Belgili bir jetistik bar. Bul – áleýmettik mańyzy bar azyq-túlik taýary baǵasynyń nóldik ósimi, birqatarynyń baǵasynyń tómendeýi. Baǵa monitoringi apta saiyn júrgiziledi. Jaýapty memlekettik organ anyqtaldy. Sonda da azyq-túlik baǵasynyń jalpy deńgeii kóterildi. 2021 jylǵy ósim 9,9 paiyzǵa jetti», - dedi A. Qońyrov Úkimet basshysy Álihan Smaiylovtyń atyna joldaǵan saýalynda.
Onyń aitýynsha, halyqtyń tabysynyń 56 paiyzdan astamy azyq-túlikke jumsaldy. Brqatar óńirlerde (Almaty, Atyraý, Batys Qazaqstan, Túrkistan, Jambyl oblystarynda) shyǵys kólemi 60%-dan astam boldy. Shyǵystar eki negizgi bólikke jumsaldy - ol nan men jarma jáne et pen et ónimderine.
2021 jylǵy qańtar-qarashada onyń aldyndaǵy jyldyń sáikes kezeńimen salystyrǵanda nan-toqash ónimderi men jarma – 9,1% -ǵa, onyń ishinde jarma – 20,2%-ǵa, makaron ónimderi – 11,5%-ǵa qymbattady. Et baǵasy 8,7% - ǵa, onyń ishinde qoi eti – 15,1%-ǵa, jylqy eti 10%-ǵa ósti.
«Qarapaiym adamdar úshin mańyzdy azyq-túliktiń baǵasy 2 tańbaly sanmen esepteledi. Sondyqtan baǵanyń ósýin tejeýdi tek taktikalyq turǵydaǵy jeńis dep sanaýǵa bolady. 2022 jyldyń basynda Qazaqstanda azyq-túlik baǵasy 0,2% -ǵa ósti. Ósimniń obektivti sebepteri bar», - dedi depýtat.
Onyń sózine qaraǵanda, burynǵy Úkimet Prezidenttiń Qazaqstan halqyna Joldaýynan keiin bir aptadan soń «2021-2024 jyldarǵa arnalǵan infliatsiiaǵa qarsy den qoiý sharalarynyń keshenin» bekitti. Jedel qabyldanǵandyqtan, ǵylymi turǵydan talqylaý men sapaly saraptama júrgizýge múmkindik bermedi.
«Bizge tereń, ǵylymi negizdelgen, úilesimdi jáne saraptamalyq jumys qajet. Qazaqstanda qysqa merzimdi, orta merzimdi jáne uzaq merzimdi kezeńderge baǵdarlanǵan infliatsiiaǵa qarsy ulttyq strategiia bolýy tiis. «Qazaqstan Halyq partiiasy» fraktsiiasy jańa Úkimetti infliatsiiaǵa qarsy jumys tásilin qaita qaraýǵa shaqyrady», - dedi Aiqyn Qońyrov.
