Foto: Tengrinews.kz/Turar Qazanǵapov
Qazaqstanda infliatsiia birneshe ai qatarynan baiaýlap keledi. Bul týraly Ulttyq bank tóraǵasy Ǵalymjan Pirmatov málimdedi, dep habarlaidy Sputnik Qazaqstan.
Onyń aitýynsha, jyldyq mándegi azyq-túlik infliatsiiasy aqpan aiyndaǵy eń joǵary kórsetkish 26,2%-ten 16,5%-ke deiin baiaýlaǵan. Azyq-túlikke jatpaityn taýarlar infliatsiiasy – 17,2%-ke, aqyly qyzmetter infliatsiiasy 13,5%-ke deiin báseńdedi.
Pirmatov azyq-túlikke jatpaityn taýarlar boiynsha benzin men dizel otynynyń shekti baǵalary kóterilgendikten, janar-jaǵarmai baǵasy óskenin atap ótti.
"Qazaqstandaǵy infliatsiia úsh ai qatarynan baiaýlap, mamyr aiynda jyldyq mánde 15,9%-ke deiin tómendedi. Infliatsiianyń ailyq deńgeii 0,6%-ti qurady. Ulttyq bank infliatsiianyń baiaýlaý úrdisi odan ári jalǵasady dep kútedi", - dedi Ǵalymjan Pirmatov Úkimet otyrysynda.
Aitýynsha, syrtqy ekonomikalyq koniýnktýranyń jaqsarýy infliatsiiany tejeýge yqpal etedi. Ol azyq-túliktiń odan ári arzandaýynan jáne saýda-seriktes elderdegi tómen infliatsiiadan baiqalady.
Pirmatov biyl 26 mamyrda Ulttyq bank táýekelder balansyn eskere otyryp, bazalyq mólsherlemeni 16,75% deńgeiinde saqtaý týraly sheshim qabyldaǵanyn eske saldy. Aitýynsha, bul eldegi infliatsiiany odan ári baiaýlatýǵa yqpal etedi.
