Infliatsiia deńgeiin baqylaý jáne ony tómendetýge qatysty jańa sharalar kesheni ázirlendi. Bul týraly Úkimet otyrysynda QR Premer-Ministri Álihan Smaiylov aitty dep habarlaidy QazAqparat.
«Prezident biýdjettiń kiris bóligin ulǵaitý máselesin atap kórsetti. Qazirgi tańda taý-ken sektorynda paidaly qazbalardy óndirýge salynatyn salyq mólsherlemesin, munai ónimderin óndirýshilerge arnalǵan aktsizderdi, jer qoinaýyn paidalanýshylardyń dividentteri boiynsha jeńildikterdi jáne transferttik baǵa belgileý tártibin qaita qaraý boiynsha usynystar daiyn boldy. Ulttyq ekonomika jáne Qarjy ministrlikteri osy usynystardy jurtshylyq pen bizneske keńinen túsindirip, olardyń tez arada zań júzinde bekitilýin qamtamasyz etýi qajet», - dedi Úkimet basshysy.
Sonymen qatar ol maining salasynyń problemalyq máselelerin shuǵyl retteý qajettigine nazar aýdartty.
«Qazirgi kezde Úkimet maining tásilderin qaita qarap jatyr. Bul salany retteý jáne damytý úshin Tsifrlyq damý ministrligi múddeli memlekettik organdarmen birlesip, barlyq máselelerdi Májilis depýtattary bastamashy bolǵan «Tsifrlyq aktivter týraly» zań jobasy aiasynda pysyqtaýy qajet», - dedi Premer-Ministr.
Sonymen qatar Úkimet basshysy Prezident tapsyrmasyna sáikes, Infliatsiia deńgeiin baqylaý jáne ony tómendetýge qatysty jańa sharalar kesheni ázirlengenin aitty.
«Ol egis alqaptaryn kóbeitý jáne azyq-túlik ónimderin óndirý men óńdeý salasyndaǵy investitsiialyq jobalardy iske asyrý arqyly otandyq óndiristi ulǵaitýǵa baǵyttalǵan. Sonymen qatar janar-jaǵarmai materialdaryn óndirý men olardy bólý júiesin reformalaý boiynsha júieli sharalar qabyldanatyn bolady. Sondai-aq baǵany belgileýge baqylaý jasaý jáne monopoliiaǵa qarsy retteý sharalary kózdelip otyr. Qabyldanyp jatqan sharalar baǵany birtindep turaqtandyrýǵa, infliatsiiany nysanaly deńgeide ustap turýǵa, jáne biznes ahýaldy jaqsartýǵa yqpal etedi. Osyǵan orai Infliatsiia deńgeiin baqylaý jáne tómendetý boiynsha sharalar keshenin maquldaýdy usynamyn», - dedi ol.
Premer-Ministr memlekettik organdardyń birinshi basshylary men ákimderge atalǵan is-sharalardyń sapaly jáne tiimdi oryndalýyn erekshe baqylaýǵa alýdy tapsyrdy.
«Sharalar kesheniniń oryndalý barysyn Úkimette turaqty túrde qaraityn bolamyz. Jalpy memlekettik jáne kvazimemlekettik sektordyń satyp alýyn jetildirý boiynsha usynylǵan sharalardy qoldaimyz. Qarjy ministrligi «Samuryq-Qazyna» qorymen birlesip, osy usynystardy zań júzinde bekitý máselesin jyldamdatyp pysyqtasyn», - dedi Álihan Smaiylov.
