Búgin Qazaqstan Respýblikasynyń Sybailas jemqorlyqqa qarsy is-qimyl agenttiginiń alqa otyrysy ótti. Is-shara aiasynda Qazaqstan Respýblikasynyń bilim jáne ǵylym ministri Ashat Aimaǵambetov magistratýra men doktorantýraǵa oqýǵa túsýdiń talaptary ózgergennen keiingi jaǵdaidy aitty, – dep habarlaidy Baq.kz.
Magistratýra men doktorantýraǵa túsýdiń talaptaryn ózgertý týraly sheshimdi ótken jyly engizdik. Magistratýraǵa bailanysty kóp syn bolǵanyn bári jaqsy biletin jáne túsinetin. Sebebi ýniversitet basshysy tapsyrmalardy ózi daiyndap, testti ózi ótkizip, keiin komissiia quryp, oqýǵa da ózi qabyldaityn. Árine bul jerden joǵary oqý oryndarynyń akademiialyq erkine, olardyń sheshimdi ózi qabyldaýy kerek degen trendke qarama-qaishylyqty baiqaýǵa bolady. Alaida biz kei jaǵdaidy ortalyqtan basqarýǵa májbúrmiz. Biz bul salada júieli tártip ornatqanǵa deiin osyndai ýaqytsha sharalar qoldana turamyz. Biz magistrant ta UBT siiaqty ortalyqtandyrylǵan emtihan bolady, dep aittyq. Osynyń nátijesinde, ókinishke qarai, biyl magistrlarǵa arnalǵan birneshe myń oryn igerilmei qalyp, onyń aqshasyn biýdjetke keri qaitardyq. Aita keteiin, buǵan deiingi jyldary birde-bir oryn bos qalmai, barlyǵy igeriletin edi, – dedi bilim ministri.
Onyń aitýynsha doktorantýraǵa túsý erejeleri ózgergennen keiin túsýshiler sany azaiǵan.
Kezinde, Sovet odaǵy tusynda, dissertatsiia qorǵaǵysy keletinder úshin kandidattyq minimým bolatyn, onyń arasynda til boiynsha (frantsýz, nemis, aǵylshyn tili) emtihan da bar edi. Oǵan barlyǵy úirenip qalǵan edi. Bizde de doktorantýraǵa túsý úshin aǵylshyn tilin Ulttyq test ortalyǵynda tapsyrǵan edi. Eshkim narazy bolmai, tapsyryp, oqýǵa túsetin. 2019 jyly biz Ulttyq test ortalyǵy júrgizetin testten bas tartttyq. Sebebi bizde onyń sapasyna qatysty kúmán boldy. Adamdar oqýǵa túsken kezde 100 ball alady, al shynynda aǵylshynsha eki sózdiń basyn qurai almaidy. Osydan keiin biz tek halyqaralyq sertifikat (IELTS, TOEFL jáne t.b.) talap etetin boldyq. Biz talap etken Intermediate deńgeii de asa joǵary emes edi. Alaida kóp adamnyń oqýǵa túse almaǵanyn kórdik. Sondyqtan bul saiasatty biz ary qarai da jalǵastyratyn bolamyz, – dedi Ashat Aimaǵambetov.
