QR Bilim jáne ǵylym ministrligi Memleket tarixy institýtynyń direktory Búrkitbai Aiaǵannyń aitýynsha, búgingi jastar ǵylymǵa kóp kele bermeidi. Sebebi jalaqy - az, dep xabarlaidy QazAqparat agenttigi.
«Bizde kásibi bilimdi tegin berip, jumysshy mamandyqtarǵa aqysyz oqytý bastamasyn qolǵa alǵany óte durys boldy. Ol aýyl jastarynyń biraz problemasyn sheship berýi tiis. Mysaly, bir jaqsy dánekerleýshi aiyna bir-eki myń dollar alýy múmkin. Kei kezde oilaisyn, qinalyp, ǵylym qýyp, doktor bolǵansha, múmkin, jaqsy bir dánekerleýshi bolý qajet pa edi? Sebebi qazirgi kezde kásibi dánekerleýshige de, kásibi qurylysshyǵa da suranys bar. Ondai mamandar tapshy», - deidi tarixshy Aiaǵan.
Institýt direktorynyń aitýynsha, ǵylymda júrgen professordar kóp tabys tabýy múmkin. Alaida jas mamandar ǵylymǵa kóp kele bermeidi. Sebebi jalaqy tómen.
«Bul ózi sońǵy 20 jylda bolyp jatqan jaǵdai. Jastardyń ǵylymǵa kelýi múldem azaiyp ketken. Daryndy jigitterdiń kóbisi biznesti, ia bolmasa, memlekettik qyzmetti qýyp ketedi. Olardyń kelmeitin sebebi - jalaqy az. Sol másele qinaidy», - dep atap kórsetti professor QazAqparat tilshisine bergen suxbatynda.
Aita keteiik, «Qazaqstannyń memlekettik-jekeshelik ortalyǵy» AQ tóraǵasynyń orynbasary, «Bolashaq» baǵdarlamasynyń túlegi Ǵalymbek Mamyraevtyń oiynsha, el ekonomikasyn jańǵyrtý sharalary aiasynda jumysshy mamandyqtardan buryn keńsede otyrǵan qyzmetkerlerdi qysqartý qaýpi basym bolyp tur.
