Almaty qalasynda ótip jatqan kúres túrlerinen Qazaqstan birinshiliginde grek-rim kúresinen bes salmaqta jeńimpazdar anyqtaldy, dep habarlaidy "Ult aqparat".
Álem chempionatynyń kúmis júldegeri, almatylyq Qorlan Jahansha el birinshiliginde ekinshi oryndy qanaǵat tutty. Ol 55 keli salmaqta aqtyq synda jambyldyq Janserik Sársenbievke jol berdi. Bul salmaqta úshinshi oryn elordalyq Marlen Muqashev pen Soltústik Qazaqstan oblysynan kelgen Amanǵali Bekbolatovqa buiyrdy.
Jambyldyq taǵy bir balýan Sultan Ásetuly 63 kelide almatylyq Baǵlan Jaqanshadan ailasyn asyryp ketti. Qola júldege elordalyq Asaýhat Muhamediev pen Almaty oblysynyń balýany Ǵalym Qabdýnasarov qol jetkizdi.
Al 72 kelide atyraýlyq Qaharman Qismetov chempion atansa, almatylyq Azat Sadyqov kúmis júldeger boldy. Úzdik úshtikti almatylyq Temirlan Ómirbai men qyzylordalyq Oljas Súleimen túiindedi.
Qostanailyq Miras Barshylyqov 82 kelide qarsylas shaq keltirgen joq. Ol finalda shymkenttik Shamil Batyrovtyń osal tusyn tapty. Qostanailyq Temirlan Baiǵaniin men aqtóbelik Qýanyshbek Dosjanov qola júldege qol sozdy.
Qaraǵandylyq Erulan Ysqaqov 97 kelide finalda qyzylordalyq Oljas Syrlybaidy jeńdi. Úshinshi orynǵa Shyǵys Qazaqstannan kelgen Salaýat Ahmetqali men jambyldyq Meiirbek Qordabai ie boldy.
