Golovkinniń esimi Reseidegi bokstyń qurmet zalyna qosyldy, - dep habarlady Vesti.kz "R-Sport" portalyna silteme jasap. Portaldyń habarlaýynsha, Golovkinmen qosa Feliks Savon men Tszoý Shiminniń esimi de qurmet zalyna qosylatyn boksshylardyń qatarynda bar.
"Orta salmaqtaǵy WBC, WBA (Super), IBF jáne IBO tujyrymdary boiynsha álem chempiony qazaqstandyq Gennadii Golovkinniń esimi Máskeýdegi bokstyń qurmet zalyna qosyldy. Bul týraly Reseidiń Sochi qalasynda ótip jatqan Halyqaralyq boks forýmy barysynda belgili boldy", - delingen jariialanymda.
Qurmet zalyna Golovkinmen qatar Reseiden shyqqan Olimpiada oiyndarynyń chempiondary Aleksei Tishenko, Oleg Saitov jáne Boris Lagýtinderdiń esimderi de qosylady. Sondai-aq, qurmet zalyna qosylǵan boksshylardyń qatarynda panamalyq dańqty boksshy Robert Diýran, Olimpiada oiyndarynyń úsh dúrkin chempiony kýbalyq Feliks Savon jáne Olimpiada oiyndarynyń eki dúrkin chempiony qytailyq Tszoý Shimin de bar.
Buǵan deiin Resei boks federatsiiasynyń bas hatshysy Ýmar Kremlek Máskeýdegi bokstyń qurmet zalynyń qurylysy 2018 jyly bastalatynyn aitqan.
Aita keteiik, qazir Golovkin Sochi qalasynda Halyqaralyq boks forýmyna qatysyp jatyr. Forým 1-4 aqpan aralyǵynda ótedi. Bul jiynda birinshi ret kásipqoi bokstaǵy eń bedeldi WBA, WBC, WBO jáne IBF uiymdarynyń basshylary jinalady. Sonymen qatar, bul otyrysqa Halyqaralyq áýesqoilar boks qaýymdastyǵy (AIBA) músheleri qatysady. Golovkin kásipqoi bokstyń atynan sóz sóileidi. Odan bólek bul jiynǵa Baqtiiar Artaev jáne Baqyt Sársekbaev sekildi Olimpiadada top jarǵan qazaq boksshylary shaqyrtý alypty. Sonymen qatar, bul jiynǵa tanymal promoýter Oskar De La Hoiia da keledi dep kútilýde.
Bul jiyn barysynda ár uiymnyń promoýterleriniń de otyrysy bolady. Jiyn barysynda World Boxing Super Series (WBSS) jobasynyń jartylai finaldyq kezdesýi ótedi. Onda reseilik Mýrat Gassiev (25-0, 18 KO) pen kýbalyq Iýnier Dortikos (22-0, 21 KO) kezdesedi. "Bolshoi" sport kesheninde ótetin bul kezdesýde boksshymen IBF jáne WBA (Regular) belbeýlerine talasady.
Aita keteiik, Gassiev pen Golovkin sońǵy jyldary Big Bear (Kaliforniia shtaty, AQSh) lagerinde tanymal maman Abel Sanchestiń qol astynda jattyǵady.
