Orta salmaqtaǵy burynǵy álem chempiony Gennadii Golovkinniń bapkeri bolǵan Abel Sanches boksshy mansabyna qatysty keibir derekterdi jaiyp saldy, dep habarlaidy QazAqparat Sports.kz-ke silteme jasap.
Gennadii bapkeri Sanchespen kelisimshartty úzetindigine qatysty málimdemesinde sypaiylyq saqtaǵan bolsa, Abel óz suhbatynda boiyn kernegen yzasyn jasyra almady. Oǵan bapkerlik qyzmeti úshin aqynyń qysqaratyny unamaǵan. Artynsha, munyń astarynda aqsha máselesi jatqanyn aitty.
«Jaqsylyqty bilmeitin ashkóz. Ol jýyrda ǵana DAZN-men 100 million dollarǵa kelisimshart jasasty. Budan keiin aqsha jetpeitindigin alǵa tartyp, túbegeili sharaǵa barýǵa májbúr ekendigińizdi aitýǵa bola ma? Osynyń bári aqsha úshin. Men olardyń bul qorlyǵyna shydai almas edim. Bul yzańdy keltiredi. Sebebi bul jigit mundai qadamǵa baratynyn eshqashan oilaǵan emespin. Ony uiaty bar, adal, tárbieli dep oilaitynmyn. Bul ony osynshama ózgertetinin oilamappyn. Men yzaǵa býlyǵyp otyrmyn», - dedi Sanches ESPN-ge bergen suhbatynda.
Qazaqstandyq boksshy Gennadii Golovkin meksikalyq bapkeri Abel Sanchespen jumysyn toqtatqany týraly buǵan deiin habarlaǵan bolatynbyz.
«Men ózim úshin, mansabym úshin mańyzdy sheshim qabyldaǵanymdy jetkizgim keledi. Jetistikterime súiene otyryp, ózimdi jetildire túskim keledi. Sondyqtan endi Abel Sanchespen jattyǵý ótkizbeimin. Bul men úshin ońai sheshim bolǵan joq ári munyń Abeldiń kásibi qabiletine de esh qatysy joq. Ol - tamasha bapker, jumysyna adal, Dańq zalyna aty jazylǵan bapker. Jańa bapkerim týraly keiinirek habarlaimyn. Al búgin boksta bergen sabaqtary úshin Abelge alǵys aitamyn», - dedi ol.
