Qazaqstandyq boksshy Gennadii Golovkin (38-1-1, 34 KO) kanadalyq Stiv Rollspen (19-0, 10 KO) jekpe-jegi aldynda baspasóz máslihatyn ótkizdi, dep habarlaidy Sports.kz saity.
«Madison Square Garden»-ge qaita oralǵanyma qýanyshtymyn. Taǵy bir múmkindiktiń týǵanyna razymyn. Bul - men úshin ǵana emes, barlyq boks úshin tamasha jaǵdai, eleýli oqiǵa. Jankúierlerime óz tájiribemdi kórsetemin. Durys aitasyzdar, kóp ýaqyt ringten qalys qaldym. Biraq men anaǵurlym myqty, anaǵurlym aqyldy bolyp oraldym! Barshańyzǵa alǵys aitqym keledi, DAZN - men úshin úlken kelisimshart. Janymda senimdi adamdardyń baryn seziný keremet. Rolls - myqty boksshy, al bul - qaýipti sport. Senbi kúni naǵyz aiqas, jańa shoý bolady!», - dedi Golovkin.
Eske salaiyq, Golovkin-Rolls jekpe-jegi 8 maýsym kúni Niý-Iork qalasyndaǵy «Madison Square Garden» arenasynda ótedi. Kezdesý aralyq salmaq - 164 fýntta ótedi. Gennadii úshin bul kezdesý eki sebeppen erekshe bolmaq. Birinshiden, jańa bapkeri Djonatan Beenkspen alǵashqy aiqasy. Ekinshiden, jýyrda tiimdi kelisimshartqa qol qoiǵan DAZN strimingilik platformasyndaǵy tuńǵysh jekpe-jegi.
Buǵan deiin boksshylar Niý-Iork kóshesinde kóz arbasý rásimin ótkizdi. Sondai-aq GGG bolashaqtaǵy josparymen bólisken bolatyn.
Boks keshin qazaqstandyqtar «Qazsport» telearnasynan tikelei efirden kóre alady. Bastalýy - 9 maýsym, Nur-Sultan qalasynyń ýaqytymen tańǵy saǵat 06:00.
Aita keteiik, keshtiń anderkardynda qazaqstandyqtar Áli Ahmedov amerikalyq Markýs MakDenielmen (15-0, 2KO), Bahtiiar Eiýbov AQSh-tyń taǵy bir ókili Braian Sebalomen (8-0, 4KO) kezdesedi
