Qazaqstanda gidterdiń, ekskýrsiia júrgizýshileriniń jáne týrizm nusqaýshylarynyń qyzmetin retteitin biryńǵai qaǵidalar bekitildi. Jańa qujat týristerge kórsetiletin qyzmettiń sapasyn arttyrýǵa, mamandardyń jaýapkershiligin naqtylaýǵa jáne saiahattardyń qaýipsizdigin kúsheitýge baǵyttalǵan, dep habarlaidy ult.kz.
Qaǵidalarǵa sáikes, gidter, ekskýrsiia júrgizýshileri men týrizm nusqaýshylary týristerge senimdi ári naqty aqparat berýge, sapar barysynda olardy alyp júrýge jáne qaýipsizdik talaptarynyń saqtalýyn qamtamasyz etýge mindetti. Sondai-aq qujatta osy úsh mamandyqtyń qyzmet aiasy naqty ajyratylǵan.
Endi gid, ekskýrsiia júrgizýshisi nemese týrizm nusqaýshysy retinde jumys isteý úshin Qazaqstan Respýblikasynyń azamaty bolýy jáne eLicense.kz portaly arqyly qyzmetin bastaǵany týraly habarlama jiberýi qajet. Sonymen qatar mamandar ózderine qolaily uiymdyq-quqyqtyq nysandy derbes tańdai alady. Qazirgi ýaqytta olardy ózin-ózi jumyspen qamtyǵan azamattardyń qyzmet túrleri tizimine engizý jumystary júrgizilip jatyr.
Týrizm jáne sport ministrligi kelip túsken habarlamalar negizinde gidterdiń, ekskýrsiia júrgizýshileriniń jáne týrizm nusqaýshylarynyń memlekettik elektrondy tizilimin qalyptastyrady. Bul tizilim Ministrlik pen «Kazakh Tourism» ulttyq kompaniiasynyń resmi saittarynda jariialanyp, týristerge zańdy túrde qyzmet kórsetetin mamandardy tańdaýǵa múmkindik beredi.
Qujatta týristerdiń qaýipsizdigine erekshe mán berilgen. Jańa talaptarǵa sáikes, mamandar sapar bastalǵanǵa deiin týristerge marshrýttyń erekshelikteri men yqtimal qaýip-qaterler týraly tolyq aqparat berýge mindetti. Al eger baǵyt adam ómiri men densaýlyǵyna qaýip tóndirýi múmkin bolsa, týrist táýekeldermen tanysqany týraly jazbasha túrde rastaýy qajet.
Budan bólek, tótenshe jaǵdai týyndaǵan kezde gidter ýákiletti memlekettik organdardy jáne týristerdiń jaqyndaryn jedel habardar etýge mindetti bolady.
Ministrliktiń málimetinshe, jańa qaǵidalardyń qabyldanýy týrizm salasyn quqyqtyq turǵydan jetildirýge, kásibi standarttardy qalyptastyrýǵa, qyzmet kórsetý sapasyn arttyrýǵa jáne Qazaqstanda ishki ári kelý týrizminiń damýyna oń yqpal etedi.
