Germaniia, Ulybritaniia jáne Frantsiia Kóshbasshylary Irandy iadrolyq kelisim boiynsha óz mindettemelerin tolyǵymen oryndaýǵa shaqyrdy, dep habarlaidy "Ult aqparat" jariialanǵan birlesken málimdemege silteme jasap.
Qujatta atalmysh memleketter AQSh-tyń Irannyń iadrolyq baǵdarlamasy boiynsha Jan-jaqty qamtylǵan birlesken is-qimyldar josparynan (Jospar) shyǵý jáne Tegeranǵa qarsy sanktsiialardy jandandyrý sheshimine ókinish jáne alańdaýshylyq bildiretinin eske saldy.
Úsh eldiń basshylary anaǵurlym kúrdelene túsken jaǵdailarǵa qaramastan, olar bul kelisimdi saqtap qalý úshin baryn salǵandaryn atap ótken.
«Irannyń iadrolyq baǵdarlamasy boiynsha Jan-jaqty qamtylǵan birlesken is-qimyldar josparynda qalyp otyrǵan taraptar – Qytai, Frantsiia, Germaniia, Resei, Ulybritaniia, Iran jáne úilestirýshi retindegi Eýropalyq odaq Jospardy saqtap qalý týraly buljymas sheshimin qýattady», - delingen málimdemede.
Germaniia, Ulybritaniia jáne Frantsiia Liderleri Irannyń kelisimge sáikes óz mindettemelerin tolyǵymen oryndaýǵa oralýynyń mańyzdylyǵyn qadap aitty.
«Biz 2019 jylǵy shildeden bastap óz mindettemelerin buzýǵa qatysty Iran tarapynyń áreketterine úlken alańdaýshylyǵymyzdy bildirdik. Bul áreketter toqtatylýy tiis. Jospardy saqtap qalý úshin onyń barlyq erejelerin qoldanyp, onyń sheńberinde Irannyń Jospar boiynsha óz mindettemelerin oryndaýyna qatysty máselelerdi sheshetin bolamyz», - delingen qujatta.
Esterińizge sala keteiik, 2015 jyldyń shilde aiynda BUU Qaýipsizdik Keńesi iadrolyq qarýdy taratpaý jónindegi jahandyq rejimniń negizi bolyp tabylatyn Irannyń iadrolyq baǵdarlamasy boiynsha Jan-jaqty qamtylǵan birlesken is-qimyldar josparyn biraýyzdan qabyldaǵan bolatyn. Shartqa Iran jáne halyqaralyq deldaldardyń «altylyǵy» - Ulybritaniia, Germaniia, Qytai, Resei, AQSh jáne Frantsiia qol qoidy. Tegeran sanktsiialardy alyp tastaý sharalarynyń ornyna atom salasyndaǵy óz zertteýlerin shekteýge kelisti.
