Koronavirýsqa qarsy vaktsina AQSh-ta birneshe ai boiy synaqtan ótkiziledi. Al jappai paidalanýǵa tek 1-1,5 jyldan keiin ǵana daiyn bolýy múmkin, dep málim etti AQSh-tyń Ulttyq densaýlyq institýtynyń direktory Entoni Faýchi.
Onyń aitýynsha, vaktsinany testileýdiń birinshi kezeńi shamamen úsh aiǵa sozylady. Bul kezeńde vaktsina 45 adamǵa, al kelesi kezeńde júzdegen, tipti myńdaǵan adamǵa synalady.
"Tipti, meilinshe jedel jasaǵan kúnniń ózinde ol 6-8 aiǵa sozylady. Sondyqtan vaktsinany jappai paidalaný úshin bir-bir jarym jyldai ýaqyt kerek", - deidi Faýchi.
Qazirgi ýaqytta Qytaida koronavirýs juqtyrǵandar sany 78 myńnan asyp, onyń 29 myńnan astamy emdelip shyqqan, dep habarlady Qytai memlekettik densaýlyq saqtaý komitetiniń málimetine súiengen RIA Novosti.
Al bul dertten kóz jumǵandardyń sany 2 715-ke jetti.
Sońǵy táýlikte Qytaidyń bir ǵana Hýbei provintsiiasynda 401 virýs juqtyrý oqiǵasy tirkelip, 52 adam qaitys bolǵan.
Ońtústik Koreiada koronavirýs juqtyrǵandar sany 1 146 adamǵa jetip, 11-i kóz jumǵan.
Aita ketsek, 2019 jyldyń 31 jeltoqsanynda Qytai biligi Dúniejúzilik densaýlyq saqtaý uiymyna eldiń ortalyq bóligindegi Ýhan qalasynda (Hýbei provintsiiasy) belgisiz pnevmoniianyń órship jatqanyn habarlady. Mamandar aýrýdyń qozdyrǵyshyn anyqtai kele, bul jańa koronavirýs ekenin málimdedi. DDU indetti halyqaralyq mańyzy bar tótenshe jaǵdai dep jariialap, aýrýdy resmi túrde COVID-19 atady.
