Búgin Astanada VII Qazaqstannyń Azamattyq forýmy ótti. Bul qoǵamdyq uiymdar men bilik ókilderiniń arasynda ózara yqpaldastyq pen is-qimyl júrgizý úshin qurylǵan erekshe suqbat alańy. Delegattar kezdesýi Qazaqstan Respýblikasy Táýelsizdiginiń 25 jyldyǵy aiasynda QR Ulttyq Mýzeiinde ótti.
Forýmǵa respýblikalyq jáne óńirlik ÚEU ókilderi, Parlament depýtattary, ortalyq jáne jergilikti atqarýshy organdarynyń ókilderi, halyqaralyq uiymdardyń ókilderi, sarapshylar jáne BAQ ókilderi qatysty.
«Azamattyq qoǵam damýynyń jaǵdaiy jáne perspektivalary» taqyrybynda ótken forýmnyń plenarlyq otyrysyna Qazaqstan Respýblikasy Premer-Ministriniń orynbasary Imanǵali Tasmaǵambetov qatysty. Talqylaý barysynda vitse-premer úkimettik emes uiymdardyń eldiń áleýmettik-ekonomikalyq jáne qoǵamdyq ómirindegi jasampaz róliniń mańyzyn erekshe atap ótti.
«Azamattyq forým degenimizdiń ózi – bir ujymnyń, ia bir uiymnyń kúndelikti ótetin jinalysy emes, pikir-talasy qainaǵan, áleýmettiń ainasyn aishyqtap, osyǵan orai usynys-tilegin daiyndaǵan naǵyz oily da oramdy orta. Onyń qoǵamǵa berer qundylyǵy da, memleketke kerek shyndyǵy da, mine, osynda. Sóz joq, osynda otyrǵan kópshiligińizdiń el damýynda qanshalyqty úlesterińiz mol bolsa, Táýelsizdigimiz ben Elbasynyń da Ózderińiz tasyn «órge domalatyp júrgen» úkimettik emes uiymdardyń ósip-órkendeýinde róli talassyz» - dedi óz sózinde Imanǵali Tasmaǵambetov.
Vitse-premer atap ótkendei, búgingi tańda Qazaqstanda 18 myńnan asa qoǵamdyq uiymdar tirkelgen, onyń ishinde 8 myń úkimettik emes uiym belsendi jumys jasaidy. Azamattyq sektorda 30 myń adam jumyspen qamtylǵan. Negizinen bul jastar saiasaty men balalar bastamasy, halyqtyń áleýmettik az qamtylǵan tobyn qoldaý, bilim jáne ǵylym, sport jáne dene tárbiesi, salaýatty ómir saltyn nasihattaý, azamattardyń ómiri men quqyqtaryn qorǵaý salasyndaǵy qyzmetter.
Forým barysynda úkimettik emes uiymdary jetistikterin kórsetetin kórme ótti. Onda Qazaqstan táýelsizdiginiń qalyptasýy men nyǵaiýyndaǵy qoǵamdyq birlestikterdiń qosqan úlesi tanystyrylyp, forým delegattary ministrlikter men vedomstvolardyń basshylarymen kezdesti. Sondai-aq, Respýblikalyq «Tanym» baiqaýynyń jeńimpazdaryn saltanatty marapattaý rásimi ótti.
Eske sala keteiik, osynaý forým qarsańynda Astana, Almaty qalalarynda jáne oblys ortalyqtarynda úkimettik emes uiymdardyń óńirlik forýmdary ótti. Onyń barysynda aimaqtar aldynda turǵan máselelerdi sheshý joldary talqylanyp, usynymdar ázirlendi jáne respýblikalyq forýmǵa qatysatyn delegattar sailandy.
Sonymen qatar, «Táýelsizdiktiń 25 jyldyǵyna ÚEU-nan 25 bastama» Respýblikalyq aktsiiasy ótti. Iaǵni, árbir óńirlik forým barysynda ÚEU ókilderi birigip aimaqtyń naqty bir problemasyn sheshýge baǵyttalǵan jobany júzege asyrý bastamasyn kóterdi. Óńirlik 16 bastamamen qatar, 9 respýblikalyq qoǵamdyq birlestik áleýmettik máselelerdi sheshýge baǵyttalǵan 9 bastama kóterdi. Osylaisha, «Táýelsizdiktiń 25 jyldyǵyna ÚEU-nan 25 bastama» Respýblikalyq aktsiiasy saltanatty túrde bastaý aldy.
.jpeg)