Freddi Merkiýridi somdaǵan Rami Malik «Úzdik akter» atalymynda «Oskar» aldy.
24 aqpanda Los-Anjelestegi Dolbi teatrynda Amerika kino akademiiasynyń "Oskar" júldesi 91-ret tapsyryldy.
Rejisser Piter Farrellidiń pianist Don Shirli men kólik júrgizýshisi Toni Vallelong arasyndaǵy dostyqty kórsetken biografiialyq "Jasyl kitap" dramasy "Úzdik film" nominatsiiasyn jeńip aldy.
"Shet tilindegi úzdik film" sanatynda Alfonso Kýaronnyń "Roma" (Meksika) filmi jeńimpaz dep tanyldy. Osy film úshin Alfonso Kýaron "Úzdik operatorlyq jumys" jáne "Úzdik rejisser" sanaty boiynsha taǵy eki "Oskardy" iemdendi.
"Qara pantera" úzdik kostiým dizainy, úzdik qoiýshy-sýretshi jumysy jáne úzdik mýzyka (Liýdvig Ioransson) úshin úsh "Oskarǵa" ie boldy.
"Bogemdyq rapsodiia" da úsh júlde aldy. Biri úzdik montaj úshin, qalǵan ekeýi úzdik dybys úshin berildi.
Osy filmniń bas keiipkeri Freddi Merkiýridi somdaǵan Rami Malek "Úzdik akter" nominatsiiasyndaǵy alǵashqy "Oskaryn" aldy. Al, "Favorit" filminde oinaǵan róli úshin "Úzlik aktrisa" júldesi Oliviia Koýlmanǵa buiyrdy. Koýlman úshin de bul – tuńǵysh "Oskar".
Qalǵan nominatsiialar boiynsha nátije mynadai:
- Ekinshi plandaǵy úzdik akter – Mahershala Ali ("Jasyl kitap");
- Ekinshi plandaǵy úzdik aktrisa – Redjina King ("Bil-strit sóilei alsa");
- Úzdik tolyq metrajdy animatsiialyq film – "Órmekshi-adam";
- Úzdik qysqa metrajdy animatsiialyq film – "Bao";
- Úzdik qysqa metrajdy derekti film – "Núkte. Sóilemniń sońy";
- Úzdik vijýal effektiler – "Aidaǵy adam";
- Úzdik qysqa metrajdy kórkem film – "Teri";
- Úzdik án – "Juldyz týdy" filmindegi "Shallow" áni.
Eske sala keteiik, Qazaqstan atynan usynylǵan Sergei Dvortsevoidyń Máskeýdegi qyrǵyz migrant qyzynyń taǵdyry týraly "Aika" dramasy bul sanatqa enbei qalǵan. "Aika" filmi buǵan deiin "Shetel tilindegi úzdik film" júldesinen úmitti toǵyz kartinanyń qatarynda short-listke engen edi.
