Quryltaishysy Forbes tizimindegi úshinshi adam bolyp sanalatyn «Adani» kompaniiasy Quryq portyn keńeitý jobasyna investitsiia salýǵa nietti, dep habarlaidy QazAqparat agenttigi.
Syrtqy ister ministriniń orynbasary Almas Aidarov Astanada ótip jatqan investitsiialyq forým kýlýarynda jýrnalisterge osyndai málimet berdi.
«Bul jolǵy qol qoiylatyn jobalardyń arasynda Aqtóbe qalasyndaǵy iadrolyq meditsina ortalyǵyn aitýǵa bolady. Quryq portyn keńeitý jónindegi joba bar. Bul joba aiasynda Úndi eliniń kompaniiasymen de qujatqa qol qoiyp jatyrmyz. Shyǵys Qazaqstandaǵy litii ken ornyn igerýge baǵyttalǵan úlken joba taǵy bar. Almatydaǵy avtokomponetterdi óńdeitin jańa zaýyt jobasyn aitýǵa bolady. Aýyl sharýashylyǵynda «Almaty jemisteri» degen jańa joba ashyp jatyrmyz», - SIM ókili Quryq portyn keńeitý jobasyna keńirek toqtaldy.
«Baǵana da aitqanymdai, jalpy jiyny 25 qujatqa qol qoiylady. Olardyń ishinde jańa jobalar da bar. Mysaly, Quryq porty boiynsha Úndi eliniń «Adani» degen úlken kompaniiasy investitsiia salmaqshy. Onyń iesi – qazir «Forbstaǵy» úshinshi adam. Olar Qazaqstanǵa jańadan enip otyr, memorandýmǵa qol qoiady. Al keibir jobalar 12 jyldyń kóleminde iske asyrylyp jatyr. Olar boiynsha da kelisimder jasalady. Satyp alý kelisimderi de bar. Litii ken orny osy baǵytta iske asady», - dedi Almas Aidarov.
Vitse-ministrdiń aitýynsha, Quryq portyn keńeitýge investitsiia salýǵa nietti «Adani» kompaniiasy Úndi elindegi logistikalyq naryqtyń 30 paiyzyn qamtidy.
«Qazaqstan aýmaǵynda birneshe jobaǵa qyzyǵýshylyq tanytyp otyr. Astana áýejaiyna qyzyǵýshylyq bildirýde. Onymen qosa Quryq portyna da terminal salýǵa yntaly. Sebebi Resei arqyly ótetin júk tasymaldaý qiyndap jatqanyna bailanysty Kaspii arqyly Ázerbaijanǵa, Grýziia arqyly Qara teńizge shyǵatyn marshrýtqa aqsha salmaqshy», - dedi vitse-ministr.
