قۇرىلتايشىسى Forbes تٸزٸمٸندەگٸ ٷشٸنشٸ ادام بولىپ سانالاتىن «Adani» كومپانيياسى قۇرىق پورتىن كەڭەيتۋ جوباسىنا ينۆەستيتسييا سالۋعا نيەتتٸ, دەپ حابارلايدى قازاقپارات اگەنتتٸگٸ.
سىرتقى ٸستەر مينيسترٸنٸڭ ورىنباسارى الماس ايداروۆ استانادا ٶتٸپ جاتقان ينۆەستيتسييالىق فورۋم كۋلۋارىندا جۋرناليستەرگە وسىنداي مەلٸمەت بەردٸ.
«بۇل جولعى قول قويىلاتىن جوبالاردىڭ اراسىندا اقتٶبە قالاسىنداعى يادرولىق مەديتسينا ورتالىعىن ايتۋعا بولادى. قۇرىق پورتىن كەڭەيتۋ جٶنٸندەگٸ جوبا بار. بۇل جوبا اياسىندا ٷندٸ ەلٸنٸڭ كومپانيياسىمەن دە قۇجاتقا قول قويىپ جاتىرمىز. شىعىس قازاقستانداعى ليتيي كەن ورنىن يگەرۋگە باعىتتالعان ٷلكەن جوبا تاعى بار. الماتىداعى اۆتوكومپونەتتەردٸ ٶڭدەيتٸن جاڭا زاۋىت جوباسىن ايتۋعا بولادى. اۋىل شارۋاشىلىعىندا «الماتى جەمٸستەرٸ» دەگەن جاڭا جوبا اشىپ جاتىرمىز», - سٸم ٶكٸلٸ قۇرىق پورتىن كەڭەيتۋ جوباسىنا كەڭٸرەك توقتالدى.
«باعانا دا ايتقانىمداي, جالپى جيىنى 25 قۇجاتقا قول قويىلادى. ولاردىڭ ٸشٸندە جاڭا جوبالار دا بار. مىسالى, قۇرىق پورتى بويىنشا ٷندٸ ەلٸنٸڭ «Adani» دەگەن ٷلكەن كومپانيياسى ينۆەستيتسييا سالماقشى. ونىڭ يەسٸ – قازٸر «فوربستاعى» ٷشٸنشٸ ادام. ولار قازاقستانعا جاڭادان ەنٸپ وتىر, مەموراندۋمعا قول قويادى. ال كەيبٸر جوبالار 12 جىلدىڭ كٶلەمٸندە ٸسكە اسىرىلىپ جاتىر. ولار بويىنشا دا كەلٸسٸمدەر جاسالادى. ساتىپ الۋ كەلٸسٸمدەرٸ دە بار. ليتيي كەن ورنى وسى باعىتتا ٸسكە اسادى», - دەدٸ الماس ايداروۆ.
ۆيتسە-مينيستردٸڭ ايتۋىنشا, قۇرىق پورتىن كەڭەيتۋگە ينۆەستيتسييا سالۋعا نيەتتٸ «Adani» كومپانيياسى ٷندٸ ەلٸندەگٸ لوگيستيكالىق نارىقتىڭ 30 پايىزىن قامتيدى.
«قازاقستان اۋماعىندا بٸرنەشە جوباعا قىزىعۋشىلىق تانىتىپ وتىر. استانا ەۋەجايىنا قىزىعۋشىلىق بٸلدٸرۋدە. ونىمەن قوسا قۇرىق پورتىنا دا تەرمينال سالۋعا ىنتالى. سەبەبٸ رەسەي ارقىلى ٶتەتٸن جٷك تاسىمالداۋ قيىنداپ جاتقانىنا بايلانىستى كاسپيي ارقىلى ەزەربايجانعا, گرۋزييا ارقىلى قارا تەڭٸزگە شىعاتىن مارشرۋتقا اقشا سالماقشى», - دەدٸ ۆيتسە-مينيستر.
