6 sáýirde amerikalyq Forbes jýrnaly álemdegi eń bai adamdardyń jańa tizimin jariialady. Oǵan tuńǵysh ret Kaspi.kz negizin qalaýshylardyń biri Mihail Lomtadze men Viacheslav Kim, Freedom Finance tobynyń jetekshisi Timýr Týrlov engen.
Qazaqstanda eń bai alty adamnyń ishinde Vladimir Kim birinshi orynda tur. Eldegi eń iri mys óndirýshi kompaniia "Qazaqmys" korporatsiiasy jetekshisiniń bailyǵyn jýrnal 4,6 mlrd dollarǵa baǵalaǵan. Álemdik tizimde 622-orynda tur. Onyń bailyǵy byltyrdan beri 900 mln dollarǵa artqan.
Ekinshi orynda eks-prezident Nursultan Nazarbaevtyń burynǵy is basqarýshysy ári kómekshisi Bolat Ótemuratov tur. Bir jylda onyń kapitaly 700 mln dollarǵa kóbeiip, 3,4 mlrd dollarǵa jetken. Byltyr Ulybritaniia soty "BTA bankinen urlanǵan aqshany jasyrýǵa kómektesti" dep kúdikke ilingen Ótemuratovtyń aktivterin buǵattai jazdaǵan.
Biyl tizimge jańadan engen Kaspi.kz negizin qalaýshylardyń biri Viacheslav Kim 3,3 mlrd dollar kapitalymen tizimde 925 oryndy ielengen. Onyń Kaspi.kz-tegi úlesi 25 paiyzdy quraidy.
Byltyr qazan aiynda qazaqstandyq Kaspi.kz kompaniiasy London saýda birjasyna aktsiialaryn shyǵaryp, úlken tabysqa kenelgen. Aqparat quraldary birer kúnde birneshe million aktsiiasyn satqan kompaniianyń negizgi aktsionerleri Viacheslav Kim men Mihail Lomtadze "milliarderler qataryna kirdi" dep jazǵan.
Mihail Lomtadze de biyl alǵash ret tizimge enip otyr. Onyń bailyǵy 2,3 mlrd dollarǵa baǵalanǵan. Tizimde 956-orynda túr. Oǵan Kaspi-diń 23 paiyz aktsiiasy tiesili. Lomtadze Grýziia azamaty bolǵanmen Qazaqstanda júrip baiyǵandyqtan tizimde qazaqstandyq kásipker retinde kórsetilgen.
Qazaqstan prezidentiniń kúieý balasy ári munai magnaty Timýr Qulybaev pen áieli Dinara Qulybaeva árqaisysy 2,8 milliard dollar kapitalymen 1111-orynnan kóringen. Bir jylda olardyń bailyǵy ózgermegen.
Biyl tizimge alǵash ret sonymen birge bailyǵy 2,2 mlrd dollarǵa baǵalanǵan Timýr Turlov ta engen. Ol tizimde 1517-orynda tur. 2020 jyly qazan aiynda Freedom Holding Corp investitsiialyq toby aktsiialaryn NASDAQ birjasyna shyǵarǵan. Timýr Týrlov Freedom Finance-tiń baqylaý paketine ie.
