6 سەۋٸردە امەريكالىق Forbes جۋرنالى ەلەمدەگٸ ەڭ باي ادامداردىڭ جاڭا تٸزٸمٸن جارييالادى. وعان تۇڭعىش رەت Kaspi.kz نەگٸزٸن قالاۋشىلاردىڭ بٸرٸ ميحايل لومتادزە مەن ۆياچەسلاۆ كيم, Freedom Finance توبىنىڭ جەتەكشٸسٸ تيمۋر تۋرلوۆ ەنگەن.
قازاقستاندا ەڭ باي التى ادامنىڭ ٸشٸندە ۆلاديمير كيم بٸرٸنشٸ ورىندا تۇر. ەلدەگٸ ەڭ ٸرٸ مىس ٶندٸرۋشٸ كومپانييا "قازاقمىس" كورپوراتسيياسى جەتەكشٸسٸنٸڭ بايلىعىن جۋرنال 4,6 ملرد دوللارعا باعالاعان. ەلەمدٸك تٸزٸمدە 622-ورىندا تۇر. ونىڭ بايلىعى بىلتىردان بەرٸ 900 ملن دوللارعا ارتقان.
ەكٸنشٸ ورىندا ەكس-پرەزيدەنت نۇرسۇلتان نازارباەۆتىڭ بۇرىنعى ٸس باسقارۋشىسى ەرٸ كٶمەكشٸسٸ بولات ٶتەمۇراتوۆ تۇر. بٸر جىلدا ونىڭ كاپيتالى 700 ملن دوللارعا كٶبەيٸپ, 3,4 ملرد دوللارعا جەتكەن. بىلتىر ۇلىبريتانييا سوتى "بتا بانكٸنەن ۇرلانعان اقشانى جاسىرۋعا كٶمەكتەستٸ" دەپ كٷدٸككە ٸلٸنگەن ٶتەمۇراتوۆتىڭ اكتيۆتەرٸن بۇعاتتاي جازداعان.
بيىل تٸزٸمگە جاڭادان ەنگەن Kaspi.kz نەگٸزٸن قالاۋشىلاردىڭ بٸرٸ ۆياچەسلاۆ كيم 3,3 ملرد دوللار كاپيتالىمەن تٸزٸمدە 925 ورىندى يەلەنگەن. ونىڭ Kaspi.kz-تەگٸ ٷلەسٸ 25 پايىزدى قۇرايدى.
بىلتىر قازان ايىندا قازاقستاندىق Kaspi.kz كومپانيياسى لوندون ساۋدا بيرجاسىنا اكتسييالارىن شىعارىپ, ٷلكەن تابىسقا كەنەلگەن. اقپارات قۇرالدارى بٸرەر كٷندە بٸرنەشە ميلليون اكتسيياسىن ساتقان كومپانييانىڭ نەگٸزگٸ اكتسيونەرلەرٸ ۆياچەسلاۆ كيم مەن ميحايل لومتادزە "ميللياردەرلەر قاتارىنا كٸردٸ" دەپ جازعان.
ميحايل لومتادزە دە بيىل العاش رەت تٸزٸمگە ەنٸپ وتىر. ونىڭ بايلىعى 2,3 ملرد دوللارعا باعالانعان. تٸزٸمدە 956-ورىندا تٷر. وعان Kaspi-دٸڭ 23 پايىز اكتسيياسى تيەسٸلٸ. لومتادزە گرۋزييا ازاماتى بولعانمەن قازاقستاندا جٷرٸپ بايىعاندىقتان تٸزٸمدە قازاقستاندىق كەسٸپكەر رەتٸندە كٶرسەتٸلگەن.
قازاقستان پرەزيدەنتٸنٸڭ كٷيەۋ بالاسى ەرٸ مۇناي ماگناتى تيمۋر قۇلىباەۆ پەن ەيەلٸ دينارا قۇلىباەۆا ەرقايسىسى 2,8 ميلليارد دوللار كاپيتالىمەن 1111-ورىننان كٶرٸنگەن. بٸر جىلدا ولاردىڭ بايلىعى ٶزگەرمەگەن.
بيىل تٸزٸمگە العاش رەت سونىمەن بٸرگە بايلىعى 2,2 ملرد دوللارعا باعالانعان تيمۋر تۇرلوۆ تا ەنگەن. ول تٸزٸمدە 1517-ورىندا تۇر. 2020 جىلى قازان ايىندا Freedom Holding Corp ينۆەستيتسييالىق توبى اكتسييالارىن NASDAQ بيرجاسىنا شىعارعان. تيمۋر تۋرلوۆ Freedom Finance-تٸڭ باقىلاۋ پاكەتٸنە يە.
