"Fly Arystan" biýdjettik áýe kompaniiasynyń biletteri qymbattaǵan joq. Buǵan deiin aitylǵan baǵamen satylyp jatyr. Bul týraly premer-ministrdiń orynbasary Jeńis Qasymbek málimdedi, dep habarlaidy Sputnik Qazaqstan tilshisi.
Belgili bolǵandai, jolaýshylardyń 2 protsenti "Fly Arystan" biletterin qymbatqa satyp alǵan.
"Joq, bul shyndyqqa sáikes kelmeidi. Men bir apta buryn monitoring jasadym. Biletterdiń jalpy sanynyń 2 protsenti ǵana basqa baǵamen satylǵan. Al, negizinen, biletter kompaniia belgilegen baǵamen satylyp jatyr. Máselen, Oral baǵytyna – 12-13 myń teńge, Tarazǵa – 6 900 teńge", - dedi Qasymbek úkimet kýlýarynda.
Úkimet basshysynyń orynbasary bilet qunynyń ártúrli bolýy jolaýshynyń júgi men tańdaǵan ornyna bailanysty ekenin aitty.
"Bireý júgimen ushady, endi bireýleri barlyq bilet satylyp ketken kezde bir-aq alady. Bul dinamikalyq júie", - dedi ol.
Onyń aitýynsha, Qazaqstannyń aviatsiialyq tasymal naryǵy aitarlyqtai úlken emes. Jyl saiyn 5-6 million adam ushady.
"Qazir Nur-Sultan men Almaty arasynda qatynaityn temirjol jolaýshylarynyń bir bóligi osy loýkosterge aýysyp jatyr", - dedi Qasymbek.
Aitýynsha, biyl Fly Arystan áýe kompaniiasynda tórt ushaq bolady. Jańa áýe kompaniiasy bir jyldyń ishinde 1 million adam tasymaldaýdy josparlap otyr.
