QR Mádeniet jáne sport ministrligi kásipqoi boksshy Firýza Sháripovanyń málimdemesine resmi túrde jaýap berdi, dep habarlaidy QazAqparat tilshisi.
«Otandyq sportshyǵa qoldaý kórsetý maqsatynda Firýza Sháripovanyń WBC chempiondyq belbeýiniń iegeri Eva Valstremmen birikken jekpe-jegin ótkizý úshin QR Mádeniet jáne sport ministrligi 2018 jyldyń mamyr aiynda 74,8 mln teńge kóleminde qarajat bóldi. Alaida ol osy jekpe-jekti ótkizýdiń ornyna Iýliia Kýtsenkomen óz titýlyn qorǵaý jekpe-jegin ótkizgen. Osylaisha, asa mańyzdy birlesken kezdesýge bólingen 74,8 mln teńge qarajat titýldy qorǵaý jekpe-jegin uiymdastyrýǵa jumsalǵan», - deidi QR MSM Sport jáne dene shynyqtyrý isteri komitetiniń tóraǵasy Serik Sápiev.
Eske sala ketsek, Firýza Sháripova IBO tujyrymy boiynsha álem chempiony titýlynan jáne WBC Silver belbeýinen aiyrylǵany osyǵan deiin habarlanǵan bolatyn. Oǵan qatysty sportshy:
«Bul - qalypty jaǵdai, sebebi bir jyldan beri qorǵalǵan joq. Chempion óz belbeýin qorǵaýy tiis. Ótken jyldyń sońynda Eva Valstremmen birlesken aiqas ótkizýdi josparladyq. Ol - WBC tujyrymy boiynsha chempiondyq titýldyń iegeri. Qarjylandyrýǵa kómek suradyq. Ákimdikter men Mádeniet jáne sport ministrine hat joldadyq. Ókinishke qarai, bizge qarajat tabylmady», - degen edi.
Onyń aitýynsha, E. Valstrem úlken kólemdegi gonorar suraǵan.
«Munyń aldynda WIBA titýlyn qorǵadym, sondyqtan men osy nusqadaǵy álem chempionymyn. Men belbeýlerimdi joǵaltqan joqpyn, kelesi aiqasta ony ringke alyp shyǵamyn. Men osy nusqadaǵy qazirgi álem chempiony mártebesinen aiyryldym. Bul meniń jáne komandamnyń kinási emes - men odan aiqasta jeńilgendikten aiyrylmadym. Qazaqstanda bizdi eshkim qoldaǵan joq», - dep atap ótti ol.
