«Feniks» kinofilmine bólingen qarjyny rejisser Tuńǵyshbai Jamanqulov uialy telefonynyń aqysy men óz úiin kúzetýge jumsaǵan. Bul týraly sot otyrysynda «Feniks» kinofilminiń burynǵy bas direktory Kerimjan Esbaev málim etti.
Kýágerdiń ózi «Feniks» kinokartinasynyń bas direktory bolyp formaldy túrde tirkelgenimen, filmge eshqandai qatysy bolmaǵanyn áńgimelep berdi.
Kerimjan Esbaev atalǵan jumysqa ózin Tuńǵyshbai Jamanqulov shaqyryp, tikelei taǵaiyndaǵanyn aitty. Atap aitarlyǵy, onyń ai saiyn alatyn jalaqysy T. Jamanqulovtyń jeke qajettilikterine jumsalyp otyrǵan.
«Aqsha T. Jamanqulovtyń úiin jóndeýge, kommýnaldyq qyzmet aqysyna, uialy telefony jáne úiiniń kúzet qyzmetiniń aqysyn tóleýge jumsaldy. Bul tólemder tikelei T. Jamanqulovtyń nusqaýymen jóneltildi. Al shyǵyndardy men óz jýrnalyma jazyp otyrdym, sol jýrnaldy óz erkimmen tergeý organdaryna berdim. Sondai-aq, aqsha T. Jamanqulovtyń ulynyń Máskeýge baryp-qaitqan jolyna jumsaldy», - dep áńgimeledi kýáger.
Sot otyrysynda Kerimjan Esbaev T. Jamanqulovtyń shyǵyndaryn rastaityn qujattardy sotqa usyndy.
Buǵan qosa, kýáger Tuńǵyshbai Jamanqulovqa arnalǵan qarjynyń qalai qolma-qol aqshaǵa ainaldyrylǵanyn egjei-tegjeili áńgimeledi. «Jamanqulov «Fenikstiń» prodiýseri N. Iýdinaǵa 6 mln. teńgeni qolma-qol aqshaǵa ainaldyrýǵa nusqaý berdi. Bul áńgimeni kartinanyń rejisseri Talǵat Jánibekov, redaktory Ǵizat Sultanov jáne esepshi Nazgúl Júnisova óz qulaǵymen estidi»,- dedi sotta K. Esbaev.
Kýáger sondai-aq, qylmystyq is sybailas jemqorlyqqa qarsy is-qimyl qyzmetine berilgen soń T. Jamanqulov filmdi túsirýshiler tobyn jinap alyp, eshkimniń ózine qarsy quzyrly organdarǵa túsinik bermeýin qadap tapsyrǵanyn ashyq aitty.
«21 nemese 23 qańtarda Jamanqulov maǵan qońyraý shalyp, óz keńsesine shaqyrdy. Keńsege kelgenimde meni buryn quzyrly organdarǵa bergen jaýaptarymnan bas tartýdy ótindi, al eger bas tartpaǵan jaǵdaida meni qylmystyq jaýapkershilikke tartý úshin qolynan kelgen nárseniń barlyǵyn jasaitynyn atyp, qorqytty», - dep sózin aiaqtady kýáger.
Eske sala keteiik, Sybailas jemqorlyqqa qarsy is-qimyl jónindegi Ulttyq biýro «Feniks» kinofilmin túsirýge bólingen biýdjet qarajatynyń urlanǵany týraly faktilerdi anyqtady. Tergeýdiń nusqasy boiynsha, filmdi túsirýge bólingen 79 mln. teńgeniń 69 mln-yn kartinanyń prodiýseri Tuńǵyshbai Jamanqulov jymqyrǵan. Osy maqsatqa ol ózi quryltaishy bolyp tabylatyn «T.K. TURAN UNIVERSAL BUSINESS» firmasyn paidalanǵan.
Aita ketelik, tergeý barysynda Tuńǵyshbai Jamanqulov óziniń qorǵaýshysynyń kózinshe biýdjet qarajatyn urlaǵanyn tolyq moiyndady. Sondai-aq, jymqyrylǵan aqshany qolma-qol aqshaǵa ainaldyryp, óziniń jeke qajettilikterin qanaǵattandyrýǵa jumsalǵanyn aitty.
