Facebook korporatsiiasy Jańa Zelandiianyń Kraistcherch qalasyndaǵy eki meshitke shabýyl jasalǵannan keiin alǵashqy bir táýliktiń ishinde atys týraly bir jarym millionnan asa videony óshirgen. Bul týraly Facebook-tiń Jańa Zelandiiadaǵy ókili Miia Gerlik habarlady. Onyń sózinshe, qylmyskerdiń jurtqa oq jaýdyryp jatqan sáti kórsetilmegen, redaktsiia óńdeýinen ótken videolar da óshirilgen. Qylmys jasady degen aiyp taǵylǵan Brenton Tarrant shabýyl barysyn Facebook-te tikelei transliatsiiada kórsetken.
Shabýyldyń alǵashqy saǵatynda 17 minýttyq video men onyń úzindileri áleýmettik jelige tarap ketti. Olardy jariialamaýǵa shaqyrǵan politsiianyń eskertýine qaramastan, kei BAQ, sonyń ishinde avstraliialyq aqparat quraldary álgi videolardy paidalanǵan.
Osydan kei synshylar "óz ishki erejesine qaishy keletin transliatsiiany toqtatpady", "atys jaily videonyń taralýyna tyiym salýda jetkilikti belsendilik tanytpady" dep Facebook-ti aiyptady. 15 naýryzda Jańa Zelandiiada bolǵan qarýly shabýyldy bilik terakt dep atady. Kraistcherch qalasyndaǵy eki meshitke jasalǵan shabýyldan keminde 50 adam qaza taýyp, 20 adam jaralandy.
Ózin "aq násildi ultshylmyn" dep ataityn 28 jastaǵy Avstraliia azamaty Brenton Tarrant osy qylmysqa kúdikti retinde ustalǵan. 16 naýryzda aimaqtyq sot oǵan "adam óltirý" baby boiynsha aiyp taqty. Qazir qamaýda otyrǵan Tarranttyń taǵy eki "sybailasy" shabýylǵa qatysy bolýy múmkin degen kúdikpen ustaldy.
