Facebook كورپوراتسيياسى جاڭا زەلاندييانىڭ كرايستچەرچ قالاسىنداعى ەكٸ مەشٸتكە شابۋىل جاسالعاننان كەيٸن العاشقى بٸر تەۋلٸكتٸڭ ٸشٸندە اتىس تۋرالى بٸر جارىم ميلليوننان اسا ۆيدەونى ٶشٸرگەن. بۇل تۋرالى Facebook-تٸڭ جاڭا زەلانديياداعى ٶكٸلٸ مييا گەرليك حابارلادى. ونىڭ سٶزٸنشە, قىلمىسكەردٸڭ جۇرتقا وق جاۋدىرىپ جاتقان سەتٸ كٶرسەتٸلمەگەن, رەداكتسييا ٶڭدەۋٸنەن ٶتكەن ۆيدەولار دا ٶشٸرٸلگەن. قىلمىس جاسادى دەگەن ايىپ تاعىلعان برەنتون تاررانت شابۋىل بارىسىن Facebook-تە تٸكەلەي ترانسلياتسييادا كٶرسەتكەن.
شابۋىلدىڭ العاشقى ساعاتىندا 17 مينۋتتىق ۆيدەو مەن ونىڭ ٷزٸندٸلەرٸ ەلەۋمەتتٸك جەلٸگە تاراپ كەتتٸ. ولاردى جارييالاماۋعا شاقىرعان پوليتسييانىڭ ەسكەرتۋٸنە قاراماستان, كەي باق, سونىڭ ٸشٸندە اۆسترالييالىق اقپارات قۇرالدارى ەلگٸ ۆيدەولاردى پايدالانعان.
وسىدان كەي سىنشىلار "ٶز ٸشكٸ ەرەجەسٸنە قايشى كەلەتٸن ترانسلياتسييانى توقتاتپادى", "اتىس جايلى ۆيدەونىڭ تارالۋىنا تىيىم سالۋدا جەتكٸلٸكتٸ بەلسەندٸلٸك تانىتپادى" دەپ Facebook-تٸ ايىپتادى. 15 ناۋرىزدا جاڭا زەلاندييادا بولعان قارۋلى شابۋىلدى بيلٸك تەراكت دەپ اتادى. كرايستچەرچ قالاسىنداعى ەكٸ مەشٸتكە جاسالعان شابۋىلدان كەمٸندە 50 ادام قازا تاۋىپ, 20 ادام جارالاندى.
ٶزٸن "اق نەسٸلدٸ ۇلتشىلمىن" دەپ اتايتىن 28 جاستاعى اۆسترالييا ازاماتى برەنتون تاررانت وسى قىلمىسقا كٷدٸكتٸ رەتٸندە ۇستالعان. 16 ناۋرىزدا ايماقتىق سوت وعان "ادام ٶلتٸرۋ" بابى بويىنشا ايىپ تاقتى. قازٸر قاماۋدا وتىرعان تاررانتتىڭ تاعى ەكٸ "سىبايلاسى" شابۋىلعا قاتىسى بولۋى مٷمكٸن دەگەن كٷدٸكپەن ۇستالدى.
