«Eir Astana» ushaǵynda qazaqstandyqtyń qomaqty qarajatyn urlaǵan Qytai azamatshasy ustaldy. Bul týraly Kóliktegi politsiia departamentinen málim etti, - dep habarlaidy «Ult aqparat».
Departamenttiń habarlaýynsha, QHR azamatshasy kinásin tolyqtai moiyndaǵan. Urlanǵan aqsha tárkilenip, iesine qaitarylǵan.
«Nur-Sultan qalasy áýejaiynyń jelilik politsiia bólimine 40 jastaǵy Qazaqstan azamatshasy júginip, «Eir Astana» áýe kompaniiasynyń «Beijiń-Nur-Sultan» baǵytyndaǵy áýe kemesimen ushyp kele jatqanda qol sómkesindegi 4 500 AQSh dollarynyń (1 744 290 teńge) joǵalǵanyn aityp shaǵymdandy. Kólik politsieileri jedel izdeý barysynda osy reispen ushyp kelgen 1993 jyly týǵan QHR azamatshasyn anyqtap, ustady», - dep atap ótedi departamentten.
Vedomstvo málimetinshe, Qytai azamatshasynyń sómkesin tekserip qaraý barysynda joǵalǵan 1 744 290 teńge tabylǵan.
«Nur-Sultan qalasy Esil aýdandyq sotynyń úkimimen QHR azamatshasy Qylmystyq kodekstiń 188-baby 3-tarmaǵy 1-tarmaqshasynda kózdelgen qylmysty jasaǵany úshin kináli dep tanyldy. Oǵan shartty túrde 3 jylǵa bas bostandyǵyn aiyrý, májbúrli túrde Qazaqstan Respýblikasynan tysqary shyǵarý, 5 jyl merzimge Qazaqstan Respýblikasynyń aýmaǵyna kelýge tyiym salý jazasy taǵaiyndaldy» delingen taratylǵan aqparatta.
