Búkil álemge «Jasyl etik» degen atpen tanylǵan alpinistiń Everestte qalǵan denesi araǵa 30 jylǵa jýyq ýaqyt salyp resmi túrde anyqtaldy. DNQ saraptamasynyń nátijesi marqumnyń úndistandyq alpinist Dordje Morýp ekenin rastady. Ol qaiǵyly oqiǵa kezinde 47 jasta bolǵan, dep habarlaidy ult.kz BILD basylymyna silteme jasap
Marqumnyń jeke basyn Úndi-Tibet shekara politsiiasy (ITBP) rastady. Vedomstvo málimetinshe, jaqynda onyń súiegin Everesttiń «ólim aimaǵy» dep atalatyn, teńiz deńgeiinen 8 myń metrden joǵary ornalasqan bóliginen evakýatsiialaý júrgiziledi. Qazir politsiia mundai biiktiktegi kúrdeli operatsiialardy júrgizý tájiribesi bar kompaniiany izdestirip jatyr.
Dordje Morýp 1996 jylǵy 10 mamyrda Everestke soltústik baǵytpen kóterilip bara jatqan kezde qaza tapqan. Ol alty adamnan turatyn alpinister tobynyń quramynda bolǵan. Ekspeditsiia músheleri shyńǵa jaqyn mańda qatty qarly boranǵa tap bolǵan kezde, olardyń úsheýi keri qaitýǵa sheshim qabyldaǵan. Al Morýp taǵy eki serigimen birge jolyn jalǵastyrǵan. Alaida kóp uzamai úsheýi de qaza tapqan.
Asa kúrdeli tabiǵi jaǵdai men qutqarý jumystarynyń joǵary qaýipine bailanysty alpinistiń denesin taýdan túsirý múmkin bolmaǵan. Onyń denesi 30 jylǵa jýyq ýaqyt boiy Everest baýraiynda jatty. Qar men muz deneni derlik ózgerissiz kúide saqtap qalǵan. Osy ýaqyt aralyǵynda «Jasyl etik» Soltústik-shyǵys jotasy arqyly shyńǵa kóteriletin alpinister úshin eń tanymal baǵdarlardyń birine ainaldy.
Marqumnyń kim ekeni uzaq jyldar boiy talas týdyryp keldi. Kópshilik «Jasyl etik» degen atpen belgili alpinist sol ekspeditsiianyń taǵy bir múshesi – 28 jasynda qaza tapqan úndistandyq alpinist Tsevang Paldjor bolýy múmkin dep eseptegen.
Alaida júrgizilgen DNQ saraptamasy bul máselege núkte qoidy. Zertteý nátijesi «Jasyl etiktiń» shyn máninde Dordje Morýp ekenin naqty rastady.
